ইণ্টাৰ্নেশ্যনেল ডেস্ক, 16 নৱেম্বৰ: শ্ৰীলংকাত আজি ৰাষ্ট্ৰপতি নিৰ্বাচন ৷ নিৰ্বাচনৰ মাজতে পূব শ্ৰীলংকাত অৱস্থিত মান্নাৰত অচিনাক্ত বন্দুৰধাৰীৰ আক্ৰমণ ৷ ভোটদাতা কঢ়িওৱা এখন বাছৰ ওপৰত চলালে এই আক্ৰমণ ৷ অচিনাক্ত দুৰ্বৃত্তৰ এটা দলে প্ৰথমে দুখন বাছলৈ শিলগুটি দলিয়াই আৰু তাৰ পিছত বাছ দুখনৰ ওপৰত অতৰ্কিতে গুলিবৰ্ষণ কৰে ৷ দুয়োখন বাছতে ভোটদাতা আছিল ৷ এই ঘটনাত কোনো লোক হতাহত হোৱা নাই বুলি আৰক্ষীয়ে জানিবলৈ দিছে ৷ দুৰ্বৃত্তই মাজ ৰাস্তাত টায়াৰ জ্বলাই 100 খন গাড়ীৰ এটা কনভয়ৰ ওপৰত আক্ৰমণ সংঘটিত কৰে ৷ আৰক্ষীয়ে জানিবলৈ দিয়া অনুসৰি এম্বুশ্বৰ লক্ষ আছিল দুৰ্বৃত্তৰ ৷
উল্লেখযোগ্য যে, দেশখনত শনিবাৰে পুৱা 7 বজাৰ পৰা বিয়লি 5 বজালৈ চলিব ভোটদান ৷ 12 হাজাৰ প’লিং বুথত 68 হাজাৰ সুৰক্ষা কৰ্মী নিয়োগ কৰা হৈছে এই নিৰ্বাচনত ৷ 16 মিলিয়ন ভোটদাতায়ে 35 জন প্ৰাৰ্থীৰ ভাগ্য নিৰ্নয় কৰিব ৷
