নিউজ ডেস্ক, 22 এপ্ৰিলঃ ধাৰাবাহিক বোমা বিস্ফোৰণে কপাই যোৱা শ্ৰীলংকা বিস্ফোৰণৰ ঘটনাৰ আগতীয়া সম্ভেদ লাভ কৰিছিল দেশখনৰ আৰক্ষীয়ে ৷ সংবাদ প্ৰতিষ্ঠান চিএনএনৰ উদ্ধৃতিৰে এ এন আয়ে প্ৰকাশ কৰিছে এই বাতৰি ৷
শ্ৰীলংকা আৰক্ষীৰ ডি আই জি স্বাক্ষৰিত এক পত্ৰত সন্দেহজনক বোমা বিস্ফোৰণৰ তথ্য বিগত 11 এপ্ৰিলতে প্ৰকাশ পাইছিল ৷ চোৰাংচোৱাৰ তথ্য সম্বলিত এক পত্ৰযোগে দেশখনৰ গৃহবিভাগে আৰক্ষীৰ লগতে চোৰাংচোৱাক সষ্টম হৈ থাকিবলৈ নিৰ্দেশ প্ৰদান কৰিছিল ৷ কিন্তু নিৰ্দেশনা পালনত আৰক্ষী তথা চোৰাংচোৱা ব্যৰ্থ হোৱাৰ বাবেই দেওবাৰে অৰ্থাৎ 21 এপ্ৰিলত আঠটাকৈ ধাৰাবাহিক বোমা বিস্ফোৰণে কপাই তোলে দেশখনৰ গীৰ্জা আৰু হোটেলকে ধৰি আঠটাকৈ স্থান ৷
"ইনফৰমেশ্বন অৱ এন এলিজদ প্লান এটেক" নামে জাৰী কৰা নিৰ্দেশনাটোত নেশ্বনছ থ্বাহিদ জামান মোহমাদ ছাহাৰান নামে সংগঠনৰ নেতৃত্বৰ দ্বাৰা দেশখনৰ বিভিন্ন স্থানত আত্মঘাতী বিস্ফোৰণৰ পৰিকল্পনা কৰাৰ বিষয়ে প্ৰকাশ পাইছিল ৷ বিষয়টো সন্দৰ্ভত সংশ্লিষ্ট বিভাগসমূহক নিজ নিজ ঠাইত তৎপৰ হৈ থাকিবলৈ কোৱা হৈছিল ৷ ৰহস্যজনকভাৱে সমগ্ৰ নিৰ্দেশনাটো এৰাই চলাৰ লগতে বিষয়টোক গুৰুত্বসহকাৰে লোৱা নাছিল দেশখনৰ আৰক্ষী তথা চোৰাংচোৱা বিভাগে ৷
বিষয়টো সন্দৰ্ভত দেশখনৰ প্ৰধানমন্ত্ৰী ৰানিল ৱিকৰেমেসিংহেও অৱগত হৈছিল যদিও তেওঁক এই বিষয়ে জনোৱা নাছিল দেশখনৰ চোৰাংচোৱা বিভাগে ৷ দেশখনৰ দূৰসংযোগ আৰু যোগাযোগ মন্ত্ৰী হাৰিন ফাৰ্নান্দোৱে কি কাৰণত বিষয়টো এৰাই চলাই চলা হ'ল সেই সন্দৰ্ভত সংশ্লিষ্ট বিষয়াসকলৰ ওপৰত বিহিত ব্যৱস্থা গ্ৰহণ কৰা হ'ব বুলি প্ৰকাশ কৰিছে ৷ অৱশ্যে বিস্ফোৰণৰ 24 ঘন্টা উৱলি যোৱাৰ পিচটো এতিয়ালৈকে কোনো সংগঠনে ইয়াৰ দায়িত্ব লোৱা নাই ৷ ইতিমধ্যে দেশখনৰ বিশেষ বাহিনীয়ে ৰাজধানী চহৰ কলম্বোৰ অৰুগুৱাট্টাত অভিযান চলাই বিস্ফোৰণৰ সৈতে জড়িত থকাৰ অভিযোগত সাতগৰাকী লোকক আটক কৰিছে ৷ বোমা বিস্ফোৰণৰ ফলত 30গৰাকী বিদেশী নাগৰিককে ধৰি 207গৰাকী লোক নিহত হোৱাৰ লগতে আহত হয় 400ৰো অধিক লোক ৷ সমগ্ৰ বিশ্বই এই ঘটনাক কঠোৰ ভাষাৰে গৰিহণা দিয়াৰ লগতে নিহতসকলৰ প্ৰতি শোক প্ৰকাশ কৰিছে ৷
