ইণ্টাৰনেশ্যনেল ডেস্ক,৫ মাৰ্চ : ভয়ংকৰ বনজুইৰ কৱলত দক্ষিণ কোৰিয়া (Wildfire in South Korea)। উলজিন চহৰৰ সমীপৰ পাহাৰত সূত্ৰপাত হোৱা এই বনজুই প্ৰায় ৩,০০০ হেক্টৰ ভূমিত বিয়পি পৰিছে । ৯০ টাকৈ বাসগৃহ জ্বলি নিঃশেষ হোৱাৰ লগতে এটা অস্থায়ী পাৰমাণৱিক শক্তি কেন্দ্ৰ আৰু এটা লিকুইফাইড প্ৰাকৃতিক গেছ প্ৰকল্পৰ প্ৰতিও ভাবুকি আহিছে । বনজুই নিয়ন্ত্ৰণৰ বাবে চেষ্টা অব্যাহত ৰাখিছে দক্ষিণ কোৰিয়া প্ৰশাসনে ।
জুই নিয়ন্ত্ৰণৰ বাবে ২০০০ ৰো অধিক অগ্নিনিৰ্বাপক বাহিনী আৰু সেনা জোৱান মোতায়েন কৰা হৈছে । শুকুৰবাৰে পুৱা উলজিন চহৰৰ পৰা আৰম্ভ হোৱা এই বিধ্বংসী বনজুই চামচিওক চহৰলৈ বিয়পি পৰা দেখা গৈছে । জুইৰ ফলত প্ৰায় ৯০ টাকৈ ঘৰ আৰু অন্যান্য অট্টালিকাসমূহ ধ্বংসস্তুপত পৰিণত হৈছে । প্ৰায় ৬,০০০ লোকক সেই স্থানৰ পৰা সুৰক্ষিত স্থানলৈ লৈ যোৱা হৈছে ।
অৱশ্যে এতিয়ালৈ এই বনজুইৰ ফলত কোনো লোক হতাহত হোৱাৰ খবৰ পোৱা নাই । জুইৰ কাৰণ জানিব পৰা হোৱা নাই যদিও দক্ষিণ কোৰিয়া প্ৰশাসনে জনোৱা মতে প্ৰচণ্ড বতাহ আৰু শুকান পৰিৱেশৰ বাবে বনজুই দ্ৰুতগতিত আন স্থানলৈ বিয়পি পৰিছে । শনিবাৰে পুৱালৈকে, জুই নিয়ন্ত্ৰণৰ বাবে শ শ অগ্নিনিৰ্বাপক বাহিনী বাহনৰ লগতে ৫১ খন হেলিকপ্টাৰ আৰু ২৭৩ খন বাহন ব্যস্ত হৈ পৰিছে ।
লগতে পঢ়ক :ইউক্ৰেইনৰ পাৰমাণৱিক শক্তি প্ৰকল্পত গুলীচালনা : তোলপাৰ লাগিছে বিশ্ব ৰাজনীতিত
