ইণ্টাৰনেশ্যনেল ডেস্ক, ১৪ জুলাই: বুধবাৰে চীনৰ ছুঝ'কৌ চহৰৰ কায়ুন হোটেলত মৃত্যু হোৱা লোকৰ সংখ্যা বৃদ্ধি পালে ১৭ জনলৈ । বৰ্তমান উদ্ধাৰ অভিযান সমাপ্ত হৈছে বুলি জানিব পৰা গৈছে । সোমবাৰে বিয়লি ছাংহাই ছুঝ'কৌ চহৰৰ কায়ুন নামৰ তিনি মহলীয়া হোটেলখনৰ এটা অংশ খহি পৰে । ইয়াৰ পাচতে উদ্ধাৰকাৰী দলে আৱদ্ধ লোকসকলৰ সন্ধানত অভিযান চলায় ।
জানিব পৰা মতে, মঙলবাৰ পৰ্যন্ত ৮ জন লোকৰ মৃত্যু হোৱাৰ বিপৰীতে আৰু ৯ জন লোক সন্ধানহীন হৈ আছিল । বুধবাৰে উদ্ধাৰ অভিযান সমাপ্ত হয় । বৰ্তমানলৈকে প্ৰাপ্ত তথ্য অনুসৰি এই ভয়াবহ ঘটনাত মুঠ ১৭ জন লোকৰ মৃত্যু হয় । ইফালে ঘটনাস্থলীত অভিযান চলাই উদ্ধাৰকাৰী দলে ২৩ জন লোকক জীৱন্তে উদ্ধাৰ কৰিবলৈ সক্ষম হয় ৷
উদ্ধাৰ হোৱা আটাইকেইজনৰে অৱস্থা বৰ্তমান সুস্থিৰ বুলি জানিব পৰা গৈছে । জানিব পৰা মতে, মৃত্যু হোৱা লোকসকলৰ অধিকাংশই হোটলখনত কৰ্মৰত লোক । আৱদ্ধ লোকসকলৰ সন্ধানত প্ৰায় ৬০০ জনৰো অধিক লোকে উদ্ধাৰ অভিযান চলায় । উল্লেখ্যে যে, এই উদ্ধাৰ অভিযানত মুঠ 120 খন বাহন ব্যৱহাৰ হয় ৷
আনহাতে, হোটেলখনৰ এটা অংশ হঠাতে কিয় খহি পৰিল সেয়া, এতিয়াও জানিব পৰা হোৱা নাই । উল্লেখ্য যে, কায়ুন হোটেল ২০১৮ চনত আৰম্ভ কৰা হৈছিল । হোটেলখনত মুঠ ৫৪ টা কোঠা আছিল ।
লগতে পঢ়ক:PNB Scam : মেহুল চৌক্সিৰ অন্যতম সহযোগী ধনেশ ছেঠক জামিন
