ইন্টাৰনেশ্যনেল ডেস্ক,5 জুন: প্ৰায় 100 দিনৰ অন্তত বাংলাদেশৰ উপকূলীয় অঞ্চল ‘কোক্স বাজাৰ’ৰ পৰা 81 গৰাকী ৰোহিংগীয়া শৰণাৰ্থী ইণ্ডোনেছিয়াৰ ‘আচেহ’ত উপস্থিত হয় ৷ বাংলাদেশৰ পৰা যাত্ৰা আৰম্ভ কৰাৰ এসপ্তাহ পিছত বিগত 18 ফেব্ৰুৱাৰীত তেওঁলোকে ভ্ৰমণ কৰা নাওখনৰ যান্ত্ৰিক বিজুতি ঘটাত তেওঁলোকে আন্দামানৰ দ্বীপত আৱদ্ধ হৈ পৰিছিল ৷
ভাৰতীয় উপকূলৰক্ষী বাহিনীয়ে তেওঁলোকক খাদ্য, খোৱা পানীৰ লগতে স্বাস্থ্য সেৱাৰ যোগান ধৰিছিল ৷ ইয়াৰ উপৰিও তেওঁলোকে নাওখন মেৰামতি কৰাৰ ব্যৱস্থা কৰে যদিও নাওখনক পুনৰ সাগৰলৈ যোৱাৰ অনুমতি প্ৰদান নকৰে ৷ ভাৰতে এই শৰণাৰ্থীসকলক ওভতাই নিয়াৰ ক্ষেত্ৰত বাংলাদেশৰ সৈতে বুজাবুজি কৰিছিল যদিও বাংলাদেশে তেওঁলোকক ওভতাই নিবলৈ অস্বীকাৰ কৰে ৷ ইয়াৰ পিছতেই আন্দামান প্ৰশাসনে নাও মেৰামতিৰ বাবে অনুমতি প্ৰদান কৰে আৰু এই শৰণাৰ্থীসকলক চোৱাচিতা কৰে ৷
30 মে’ত নাওখন সম্পূৰ্ণৰূপে যাত্ৰাৰ বাবে প্ৰস্তুত হৈ উঠে আৰু সন্ধিয়াৰ ভাগত পুনৰ যাত্ৰা আৰম্ভ কৰে ৷ শুকুৰবাৰে এই 81 গৰাকী ৰোহিংগীয়া শৰণাৰ্থীৰ সৈতে নাওখন আচেহত আহি উপস্থিত হয় ৷ নাৱৰ মালিকে যাত্ৰীসকল সুস্থ শৰীৰে ইণ্ডোনেছিয়াত উপস্থিত হোৱা বুলি তেওঁলোকৰ পৰিয়ালবৰ্গক অৱগত কৰে ৷
এই শৰণাৰ্থীসকলৰ চোৱাচিতা কৰা আন্দামানৰ এক সূত্ৰই কয় যে, ‘ইণ্ডোনেছিয়া হ’ল আটাইতকৈ ওচৰৰ দক্ষিণ-পূৱ এছিয়ান সীমান্ত য’ত এই নাওখন উপস্থিত হ’ব পাৰে ৷ কাৰণ নাওখন কিমান দূৰলৈ ভ্ৰমণ কৰিব পাৰিব এই সন্দৰ্ভত নিশ্চিত নাছিল চালকৰ দলটো’৷
নাওখনৰ অৱস্থান ধৰা পৰাৰ পৰা বিৰত ৰাখিবলৈ ভাৰতীয় উপকূলৰক্ষী বাহিনীয়ে নাওখনৰ চেটেলাইট ফোনটো কাঢ়ি ৰাখিছিল ৷ নাওখনত যাত্ৰা কৰা 90 গৰাকী যাত্ৰী (65 গৰাকী মহিলা, 20 গৰাকী পুৰুষ, 5 নাবালক) ৰ 9 গৰাকী ডায়েৰিয়া আৰু ডি-হাইড্ৰেছনৰ বাবে মৃত্যুবৰণ কৰে ৷ কিন্তু ভাৰতৰ পৰা ভ্ৰমণ কৰাৰ পিছত বাকী 81 গৰাকী যাত্ৰী সুস্থ শৰীৰে ইণ্ডোনেছিয়াত উপস্থিত হয় ৷
বিগত ফেব্ৰুৱাৰী মাহত ৰাষ্ট্ৰসংঘই মানবীয় আধাৰৰ ওপৰত ভিত্তি কৰি ৰোহিংগীয়া শৰণাৰ্থীসকলৰ দায়িত্ব লোৱাৰ বাবে অনুৰোধ জনাইছিল ৷ ভাৰতীয় প্ৰশাসনে নিশ্চিত কৰে যে, নাওখনত থকা 47 গৰাকী ৰোহিংগীয়া শৰণাৰ্থীক বাংলাদেশ UNHCR-এ প্ৰদান কৰা শৰণাৰ্থী কাৰ্ড আছিল ৷
লগতে পঢ়ক- বৰপেটাৰোডত তেল চোৰ গ্ৰেপ্তাৰ
