ইন্টাৰনেশ্যনেল ডেস্ক,5 ডিচেম্বৰঃ ভাৰতীয় কৃষকসকলৰ শান্তিপূৰ্ণ প্ৰদৰ্শনৰ অধিকাৰ আছে আৰু এই ক্ষেত্ৰত প্ৰশাসনে তেওঁলোকক অনুমতি প্ৰদান কৰিব লাগে ৷ এই মন্তব্য ৰাষ্ট্ৰসংঘৰ মহাসচিব এন্টনিঅ’ গুটেৰাৰৰ মুখপাত্ৰ ষ্ট্ৰীফেন ডুজাৰিকৰ ৷
শুকুৰবাৰে ভাৰতত কৃষি বিধেয়ক, 2020ৰ বিৰুদ্ধে চলি থকা প্ৰতিবাদ সন্দৰ্ভত সাংবাদিকে কৰা প্ৰশ্নত তেখেতে কয়, "আমি সকলো লোকেই নিজৰ অধিকাৰৰ বাবে কথা কোৱাটো বিচাৰো ৷ সকলো লোকৰে শান্তিপূৰ্ণ প্ৰদৰ্শনৰ অধিকাৰ আছে আৰু এইক্ষেত্ৰত প্ৰশাসনে তেওঁলোক অনুমতি প্ৰদান কৰাটো উচিত ৷"
উল্লেখ্য যে, বিগত 9 দিনে দিল্লী হাৰিয়ানা আৰু দিল্লী উত্তৰ প্ৰদেশ সীমান্তত কৃষি বিধেয়কৰ বিৰুদ্ধে কৃষকসকলে প্ৰতিবাদ অব্যাহত ৰাখিছে ৷ এই সন্দৰ্ভত কেন্দ্ৰীয় নেতৃত্বৰে শনিবাৰে পঞ্চম স্তৰৰ বৈঠকত মিলিত হ’ব কৃষকসকল ৷ ইয়াৰ পূৰ্বে 3 ডিচেম্বৰত কেন্দ্ৰৰে চতুৰ্থ স্তৰৰ বৈঠকত মিলিত হৈছিল কৃষকসকল ৷ এই বৈঠকত বিধেয়কখনত কিছুক্ষেত্ৰত সালসলনি কৰাৰ বাবে চৰকাৰক দাবী উত্থাপন কৰিছিল প্ৰতিবাদকাৰী কৃষকসকলে ৷
লগতে পঢ়ক-আজি দিল্লীত কৃষকৰ সৈতে পঞ্চম স্তৰৰ বৈঠকত মিলিত হ’ব প্ৰধানমন্ত্ৰী মোদী
