যোৰহাট, 28 ফেব্ৰুৱাৰী : যোৰহাটত উপস্থিত হৈ অসমীয়া ছবি উদ্যোগটো সন্দৰ্ভত জুবিনে দিলে গুৰুত্বপূৰ্ণ মন্তব্য ৷ দৰ্শকেই ছবি উদ্যোগ এটা জীয়াই ৰাখিব পাৰে বুলি কৈ তেওঁ কয় যে শেহতীয়াকৈ মুক্তি পোৱা কেইবাখনো অসমীয়া ছবিয়ে অসমীয়া চলচ্চিত্ৰ উদ্যোগটো জীপাল কৰি তুলিছে ৷ এই বছৰৰ শেষৰফালে জুবিনৰ কেইবাখনো বিগবাজেটৰ ছবিয়ে মুক্তি লাভ কৰাৰ কথা ৷
ব’হাগ বিহুৰ পিচতেই জুবিনে আৰম্ভ কৰিব তেওঁৰ আগন্তুক ছবিৰ শ্বুটিং ৷ যোৰহাটত উপস্থিত হৈ এই কথা জানিবলৈ দিয়ে সংগীত শিল্পীজনে ৷ দৰাচলতে জুবিন যোৰহাট কে বি ৰোডস্থিত চেমচাঙৰ এটা বিক্ৰী কেন্দ্ৰ মুকলি কৰিবলৈ বিশেষ অতিথি হিচাপে উপস্থিত হৈছিল ৷ তাতেই তেওঁ বিহুৰ পিচতেই চিকাৰ আৰম্ভ কৰাৰ কথা কয় ৷
‘চিকাৰ’ আৰু ‘ৰৈ ৰৈ বিনালে’ জুবিনৰ আগন্তুক দুটা নতুন প্ৰজেক্ট ৷ এই নতুন ছবি দুখনলৈ বহু আশাবাদী জুবিন গাৰ্গ (Zubeen Garg upcoming Assamese movies) ৷ ‘ৰৈ ৰৈ বিনালে’ ছবিখন জুবিনৰ সম্পূৰ্ণ নিজাববীয়া ৷ সংগীতৰ পৰা আৰম্ভ কৰি কাহিনীলৈকে সকলো স্ব-ৰচিত ৷ আনহাতে ‘চিকাৰ’ সন্দৰ্ভত তেওঁ কয় যে এই ছবিখনৰ শ্বুটিং দেৱাংকৰ বৰগোহাইৰ পৰিচালনাত লণ্ডনত হ’ব ৷ দুয়োখনেই বিগ বাজেটৰ ছবি ৷
বিক্ৰী কেন্দ্ৰ মুকলি অনুষ্ঠানত জুবিনে কয় যে কাঞ্চনজংঘা, ৰত্নাকৰ, ড: বেজবৰুৱাৰ পাচতেই অসমীয়া চিনেমা উদ্যোগটোলৈ ভাল দিন ঘূৰি আহিছে । সোমবাৰে নিশা ভাগত যোৰহাট কে বি ৰোডত চেমচাঙৰ এই বিক্ৰী কেন্দ্ৰটো মুকলি কৰা হয় ৷ অসমৰ হাৰ্থ থ্ৰব গৰাকীয়ে লগতে কয় যে ভাল কাহিনী আৰু উন্নত মানসম্পন্ন প্ৰযুক্তি ব্যৱহাৰ কৰিলে অসমীয়া ছবিয়ে সফলতাৰ ধাৰা অব্যাহত ৰাখিব পাৰিব ।
‘মই বা আমি অসমীয়া চিনেমা নিৰ্মাণ কৰি থাকিম, মাথো আমাক অসমবাসী ৰাইজে সহযোগ কৰি থাকক’, এই মন্তব্য জনপ্ৰিয় কণ্ঠশিল্পী গৰাকীৰ (upcoming Assamese movies) । আনহাতে বিহু মঞ্চত এইবাৰ আগতীয়াকৈ দেখিবলৈ পোৱা যাব জুবিনক ৷ জুবিনৰ লগত মঞ্চত সহ শিল্পীৰ ৰূপে নতুন সহযোগী শিল্পী থাকিব এইবাৰ ৷ বিহুৰ প্ৰথম ভাগত জুবিন গাৰ্গে বহিঃৰাজ্যতহে কৰিব সংগীত পৰিৱেশন ।
শেহতীয়াকৈ মুক্তি পোৱা ৰবি শৰ্মাৰ ব্লেক এণ্ড হোৱাইট ছবিখন সন্দৰ্ভতো মত দিয়ে জুবিনে ৷ ‘অসমীয়া ছবি জগতৰ এজন মোৰ ভাল লগা অভিনেতা’, এইদৰে কৈ জুবিনে ৰবি শৰ্মাক এজন দক্ষ অভিনেতা হিচাপে অভিহিত কৰি তেওঁৰ ছবি নিশ্চয়কৈ ভাল হ’ব বুলি দৰ্শকক ছবিখন চাবলৈ অনুৰোধ জনায় ৷
উল্লেখ যোগ্য যে, পূৰ্বে ম্লান হৈ পৰা অসমীয়া ছবি উদ্যোগটোক উদ্ধাৰ কৰিবলৈ সেই সময়ত আগবাঢ়ি অহা নাছিল কোনো লোক । কিন্তু অসমীয়া জাতিৰ প্ৰতি থকা অনবদ্য মৰমৰ বাবে আগবাঢ়ি আহিছিল জনপ্ৰিয় শিল্পী জুবিন গাৰ্গ আৰু আজি জুবিন গাৰ্গৰ বাবেই পুনৰ উদ্ধাৰ হ'ল অসমীয়া ছবি উদ্যোগটো ।
লগতে পঢ়ক : Assamese movie Black N White : ৰবি শৰ্মা কেনেকৈ অকলশৰীয়া ! নিজকে ৰবি শৰ্মাৰ ফেন আখ্যা পৱিত্ৰ মাৰ্ঘেৰিটাৰ
