চিটাৰা ডেস্ক, ২৫ ছেপ্টেম্বৰ: সম্প্ৰতি দেশজুৰি আনন্দ-উল্লাসেৰে উদযাপন কৰা হৈছে গণেশ চতুৰ্থী ৷ এই উৎসৱ সমগ্ৰ দেশজুৰি ধুমধামেৰে উদযাপন কৰা হয় যদিও মহাৰাষ্ট্ৰত এই উৎসৱ অতি আড়ম্বৰেৰে পালন কৰা হয় । ইফালে বিগত কেইবাদিন ধৰি বি-টাউনৰ চেলিব্ৰিটিসকলে গণেশ বাবাক ঘৰত আদৰণি জনোৱাৰ ছবি ছ’চিয়েল মিডিয়াত শ্বেয়াৰ কৰা পৰিলক্ষিত হৈছে । মহাৰাষ্ট্ৰৰ বৰ্তমানৰ মুখ্যমন্ত্ৰী একনাথ সম্ভাজী সিন্দেও গণেশ বাবাক নিজা বাসগৃহত আদৰণি জনায় ।
মুখ্যমন্ত্ৰী সিন্দেৰ গণেশ বাবাৰ আদৰণি অনুষ্ঠানত বি-টাউনৰ বহু চেলিব্ৰিটিয়ে অংশগ্ৰহণ কৰে । এই সময়ছোৱাত মুখ্যমন্ত্ৰী সিন্দেৰ ঘৰত বলীউডৰ বহু তাৰকা যেনে ছলমান খান, শ্বাহৰুখ খান, জেকী শ্ৰফ, অৰ্জুন ৰামপাল, সুনীল শেট্টী, পংকজ ত্ৰিপাঠী, অৰ্পিতা খান শৰ্মা, আয়ুষ শৰ্মা আৰু পূজা হেগড়েক গণপতি দৰ্শনৰ বাবে দেখা যায় ।
ছলমান খান আৰু শ্বাহৰুখ খানক মুখ্যমন্ত্ৰী সিন্দেৰ সৈতে একেলগে দেখা গৈছে
বলীউডৰ ছুপাৰষ্টাৰ ছলমান খান আৰু শ্বাহৰুখ খানক গণপতি বাপ্পাৰ দৰ্শনৰ বাবে মহাৰাষ্ট্ৰৰ বৰ্তমানৰ মুখ্যমন্ত্ৰী একনাথ সিন্দেৰ বাসগৃহত একেলগে দেখা যায় । ইয়াৰ মাজতে দুয়ো খানে একেলগে মুখ্যমন্ত্ৰীৰ সৈতে তেওঁৰ বাসগৃহত একেলগে ফটোৰ বাবে পোজ দিয়ে ৷ ছলমান খান আৰু শ্বাহৰুখ খানক ছবিখনত দেখা গৈছে মুখ্যমন্ত্ৰী শিন্দেৰ সৈতে । ছ’চিয়েল মিডিয়াতো তেওঁলোকৰ এই ফটো যথেষ্ট ভাইৰেল হৈ পৰিছে ।
ভগ্নী অৰ্পিতা আৰু আয়ুষৰ সৈতে মুখ্যমন্ত্ৰী সিন্দেৰ ঘৰত উপস্থিত ছলমান
আন এক ভাইৰেল ভিডিঅ’ত অভিনেতাগৰাকীক গণেশ বাবাৰ মূৰ্তিৰ সন্মুখত হাত যোৰ কৰি থিয় হৈ থকা দেখা গৈছে । এই সময়োচোৱাত পুৰোহিতে প্ৰাৰ্থনা কৰা দেখা যায় । ভিডিঅ’টোত ছলমান খানেও ভগৱানৰ মূৰ্তিলৈ ফুল আগবঢ়োৱা দেখা গৈছে । ভগ্নী অৰ্পিতা খান শৰ্মা আৰু স্বামী অভিনেতা আয়ুষ শৰ্মাৰ সৈতে মুখ্যমন্ত্ৰী সিন্দেৰ ঘৰত উপস্থিত হৈছিল ছলমান খান ।
শ্বাহৰুখ খান তেওঁৰ মেনেজাৰৰ সৈতে মুখ্যমন্ত্ৰীৰ বাসগৃহত উপস্থিত হৈছিল
শ্বাহৰুখ খান তেওঁৰ মেনেজাৰৰ সৈতে মুখ্যমন্ত্ৰী একনাথ সিন্দেৰ বাসগৃহত গণেশ চতুৰ্থী উদযাপনত উপস্থিত হৈছিল । ইয়াৰ মাজতে মুখ্যমন্ত্ৰী সিন্দে ছুপাৰষ্টাৰগৰাকীক উষ্ম আদৰণি জনাই ফুলৰ থোপা, ভগৱান গণেশৰ মূৰ্তি আৰু চাদৰ উপহাৰ দিয়ে । পিচত কিং খানে মুখ্যমন্ত্ৰীগৰাকীৰ সমগ্ৰ পৰিয়ালৰ সৈতে ছবি ক্লিক কৰে ।
গণেশ আৰতিত জেকী শ্ৰফ, সুনীল শ্বেট্টীকে ধৰি বহু তাৰকাক দেখা গৈছিল
মুখ্যমন্ত্ৰীৰ বাসগৃহত ছলমান খান আৰু শ্বাহৰুখ খানৰ উপৰিও বলীউডৰ অভিনেতা জেকী শ্ৰফ, অৰ্জুন ৰামপাল, সুনীল শ্বেট্টী আৰু পংকজ ত্ৰিপাঠীকো দেখা গৈছিল । ভাইৰেল হোৱা এটা ভিডিঅ’ত চাৰিওজন অভিনেতাক গণেশ আৰতিত নিমগ্ন হোৱা দেখা গৈছে ।
