চিটাৰা ডেস্ক, 11 ছেপ্টেম্বৰ: দক্ষিণৰ ছুপাৰষ্টাৰ আল্লু অৰ্জুনৰ ‘পুষ্পা দ্য ৰাইজ’ ছবিখন মুক্তিৰ লগে লগে দেশজুৰি আলোড়নৰ সৃষ্টি কৰিছিল ৷ 2021 চনৰ 17 ডিচেম্বৰত ছবিগৃহত মুক্তি লাভ কৰিছিল ছবিখন ৷ ছবিখনে বক্স অফিচত 373 কোটি টকা সংগ্ৰহ কৰিছিল ৷ ইয়াৰ লগে লগে বক্স অফিচত ব্লকবাষ্টাৰ ৰূপে পৰিগণিত হৈছিল এই ছবিখন ৷ কেৱল ইমানেই নহয়, এই ছবিখনত কৰা উৎকৃষ্ট অভিনয়ৰ বাবে আল্লু অৰ্জুনে লাভ কৰে ৰাষ্ট্ৰীয় চলচ্চিত্ৰ বঁটাৰ সন্মান ৷ দক্ষিণত প্ৰথমবাৰ কোনো অভিনেতাই লাভ কৰিছে এই সন্মান ৷
এই ছবিখনৰ বিপুল সফলতাৰ পিচতে এতিয়া অনুৰাগীয়ে অপেক্ষা কৰি আছে এই ছবিখনৰ দ্বিতীয় খণ্ডৰ বাবে ৷ পুষ্পা 2 ৰ বাবে অতি আগ্ৰহেৰে অপেক্ষা কৰি আছে অনুৰাগীয়ে ৷ শেহতীয়াকৈ আল্লু অৰ্জুনে পুষ্পা 2 ৰ চেটৰ পৰা কিছু আভাস শ্বেয়াৰ কৰিছিল ৷ ইয়াৰ পিচতে অনুৰাগীসকলে ছবিখনৰ মুক্তিৰ তাৰিখ জানিবলৈ আৰু উৎসুক হৈ পৰিছিল ৷ এতিয়া আমি লৈ আহিছো পুষ্পা 2 ৰ অনুৰাগীৰ বাবে এটি সুখবৰ ৷
'পুষ্পা 2' ৰ সম্পৰ্কে ডাঙৰ আপডেট
11 ছেপ্টেম্বৰত অৰ্থাৎ সোমবাৰে নিৰ্মাতাই এটা খবৰ শ্বেয়াৰ কৰিছিল, যাৰ বাবে অনুৰাগীৰ উত্তেজনাৰ মাত্ৰা দুগুণ হৈ পৰিছে । মুক্তিৰ তাৰিখ ঘোষণা কৰিছে নিৰ্মাতাই । অহা বছৰ বক্স অফিচত শাসন কৰিবলৈ সাজু হৈছে ছবিখন । 2024 চনৰ 15 আগষ্টত ছবিগৃহত মুক্তি পাব ‘পুষ্পা 2: দ্য ৰুল’।
উল্লেখ্য যে, পুষ্পা: দ্য ৰাইজ হৈছে 2021 চনৰ ভাৰতীয় তেলেগু ভাষাৰ একচন নাটক ছবি ৷ অৱশ্যে তেলেগু ভাষাতেই নহয় তামিল, কানাড়া, মালয়ালম আৰু হিন্দী ভাষাতো এই ছবিখন মুক্তি লাভ কৰিছে ৷ এই ছবিখনৰ ৰচনা আৰু পৰিচালনা কৰিছে সুকুমাৰ সেনে ।
এই ছবিখনৰ মুখ্য চৰিত্ৰত অভিনয় কৰিছে আল্লু অৰ্জুন, ফাহাদ ফাজিল আৰু ৰশ্মিকা মান্দানাই ৷ লগতে সহযোগী চৰিত্ৰত অভিনয় কৰিছে জগদীশ প্ৰতাপ বান্দৰী, সুনীল, ৰাজ তিৰাণ্ডাসু, ৰাও ৰমেশ, ধনঞ্জয়া, অনসূয়া ভৰদ্বাজ, অজয় আৰু অজয় ঘোষে । ছবিখনৰ প্ৰযোজনা কৰিছে মুটমচেটী মিডিয়াৰ সহযোগত মৈত্ৰী মুভি মেকাৰে ।
