চিটাৰা ডেস্ক, ৩ ডিচেম্বৰ: ১ ডিচেম্বৰত ছবিগৃহত মুক্তি পালে ৰণবীৰ কাপুৰৰ বহু প্ৰত্যাশিত ছবি এনিমেল ৷ মুক্তিৰ পিচৰে পৰা ছবিখনে বক্স অফিচত ধুমুহাৰ সৃষ্টি কৰিছে । ছবিখনত ৰণবীৰ কাপুৰৰ অভিনয়ক অতিশয় পছন্দ কৰিছে অনুৰাগীয়ে ৷ অৱশ্যে এই কথা নুই কৰিব নোৱাৰি যে ছবিখনত ববি দেওলৰ বলিষ্ঠ অভিনয়কো অতিশয় শলাগ লোৱা হৈছে ।
‘এনিমেল’ৰ সফলতাক লৈ আবেগিক হৈ পৰিল ববি দেওল
ছবিখনে লাভ কৰা মৰম দেখি আবেগিক হৈ পৰিল ববি দেওল, যাৰ বাবে চকুলো বৈ আহে অভিনেতাগৰাকীৰ । হয়, ছ’চিয়েল মিডিয়াত এটা ভিডিঅ’ প্ৰকাশ পাইছে, য’ত ববি দেওলে পাপাৰাজীৰ সন্মুখত হাত যোৰ কৰি সকলো অনুৰাগীক ধন্যবাদ জনাইছে । ইয়াৰ পিচতে নিজৰ বাহনত বহি কান্দিবলৈ লয় অভিনেতাগৰাকীয়ে ।
ববিৰ এই ভিডিঅ’টো ছ’চিয়েল মিডিয়াত অতি ভাইৰেল হৈ পৰিছে । ভিডিঅ’টোক লৈ অনুৰাগীয়ে প্ৰকাশ কৰিছে নিজৰ মতামত । এনিমেলত ববি দেওলৰ উৎকৃষ্ট অভিনয়ৰ বাবে অনুৰাগীয়ে তেওঁৰ প্ৰশংসাত পঞ্চমুখ হোৱা দেখা গ’ল । উল্লেখ্য যে, ছবিখনত ববি দেওলে এজন খলনায়কৰ চৰিত্ৰত অভিনয় কৰিছে, যিজন ৰণবীৰ কাপুৰৰ মাহীমাকৰ পুত্ৰ আৰু মূকবধিৰ, তেওঁৰ নাম অবৰাৰ ।
ছবিখনৰ বক্স অফিচ সংগ্ৰহ
ছবিখনৰ উপাৰ্জনৰ কথা ক’বলৈ গ’লে ছবিখনে মুক্তিৰ দিনটোত বিশ্বজুৰি ১১৬ কোটি টকা উপাৰ্জন কৰি বক্স অফিচত ঢৌৰ সৃষ্টি কৰে । ঘৰুৱা বক্স অফিচত ছবিখনে প্ৰথম দিনাই ৬৩.৮ কোটি আৰু দ্বিতীয় দিনা ৬৬ কোটি টকা উপাৰ্জন কৰিছিল । এই দুদিনত ঘৰুৱা বক্স অফিচত এনিমেলৰ মুঠ সংগ্ৰহ হৈছে ১২৯.৮০ কোটি টকা ।
লগতে পঢ়ক: ছবিগৃহত টিকটৰ নাটনি, এতিয়া ২৪/৭ ছবিগৃহত চলিব এনিমেলৰ দৰ্শনী
