চিটাৰা ডেস্ক, 8 ছেপ্টেম্বৰ: বৃহস্পতিবাৰে গোটেই বিশ্বজুৰি মুক্তি লাভ কৰিলে বলীউডৰ ছুপাৰষ্টাৰ শ্বাহৰুখ খানৰ ছবি ‘জৱান’ ৷ ছবিখনৰ মুক্তিৰ লগে লগে ছবিগৃহত ভিৰ কৰিছে অনুৰাগীয়ে ৷ কেৱল অনুৰাগীয়েই নহয়, বহু তাৰকাইয়ো এই ছবিখন উপভোগ কৰিবলৈ উপস্থিত হৈছে ছবিগৃহত ৷ অনুৰাগী আৰু তাৰকাসকলে ছবিখন চাই প্ৰতিক্ৰিয়াও প্ৰকাশ কৰিছে ৷ মুঠৰ ওপৰত ছবিখনক লৈ সকলোৱে পঞ্চমুখৰ হোৱা দেখা গৈছে ৷
এই ক্ষেত্ৰত পিচ পৰি থকা নাই আই পি এলৰ তাৰকা ৰিংকু সিং ৷ ৰিংকু সিঙেও নিজৰ দলৰ অৰ্থাৎ কলকাতা নাইট ৰাইডাৰ্ছৰ স্বত্বাধিকাৰী কিং খানৰ ছবিখন চাবলৈ উপস্থিত হয় ছবিগৃহত ৷ লগতে বেটছমেনগৰাকীয়ে নিজৰ ইনষ্টাগ্ৰামত শ্বেয়াৰ কৰে কেইখনমান ফটো ।
উল্লেখ্য যে অনুৰাগীসকলে বহুদিনৰে পৰা শ্বাহৰুখৰ ছবি ‘জৱান’ মুক্তিৰ বাবে অপেক্ষা কৰি আছিল । শ্বাহৰুখৰ অনুৰাগীৰ ভিতৰত নাম অন্তৰ্ভুক্ত আছে ৰিংকু সিঙৰ ৷ সেয়েহে, ৰিংকু সিঙে শ্বাহৰুখৰ আন অনুৰাগীৰ দৰেই প্ৰথম দিনাই শ্ব’টো উপভোগ কৰিবলৈ বহু আগতেই বুক কৰিছিল টিকট ৷ 7 ছেপ্টেম্বৰ বৃহস্পতিবাৰে ৰিংকুৱে নিজৰ অফিচিয়েল ইনষ্টাগ্ৰাম একাউণ্টত দুখন ছবি শ্বেয়াৰ কৰে । প্ৰথম ছবিখনত 25 বছৰীয়া বেটছমেন ৰিংকুক ছবিখনৰ পোষ্টাৰৰ সৈতে দেখা গৈছে, দ্বিতীয়খন ছবিত তেওঁক চিনেমা হলত বহি পপকৰ্ণ খাই ছবি উপভোগ কৰা দেখা গৈছে ।
পোষ্টটো শ্বেয়াৰ কৰি তেওঁ কেপচনত লিখিছে,
DND: মোৰ প্ৰিয় শ্বাহৰুখ খানৰ চিনেমা উপভোগ কৰি আছো । লাভ ইউ ছাৰ ।
তাৎপৰ্যপূৰ্ণভাৱে 2023 চনৰ আই পি এলত ৰিংকু সিঙে গুজৰাট টাইটানছৰ বিৰুদ্ধে অন্তিম অভাৰত একেৰাহে ৫টা ছিক্সৰ জৰিয়তে দলটোক এক ঐতিহাসিক জয় প্ৰদান কৰিছিল । তেতিয়াৰ পৰাই জনপ্ৰিয় হৈ পৰে ৰিংকুই । 16 সংখ্যক ছিজনত তেওঁৰ উৎকৃষ্ট প্ৰদৰ্শনৰ ভিত্তিত আয়াৰলেণ্ড ভ্ৰমণত টি-20 শৃংখলাত খেলাৰ সুযোগ পাইছিল আৰু দ্বিতীয় টি-20ত তেওঁ প্ৰচণ্ড ইনিংছ খেলি দলটোক এক গুঞ্জৰিত জয় প্ৰদান কৰিছিল ।
বৰ্তমান ৰিংকু সিঙে ইউ পিৰ টি-20 লীগত মীৰুট মেভেৰিক্সৰ হৈ খেলি আছে, য’ত তেওঁ প্ৰতিযোগিতাখনৰ দ্বিতীয়খন মেচত একেৰাহে তিনিটা ছয় মাৰি দলটোক এক ৰোমাঞ্চকৰ জয় লাভ কৰাত গুৰুত্বপূৰ্ণ ভূমিকা পালন কৰিছিল । এই ইভেণ্টতো ৰিংকুৱে নিজৰ ধুমুহাময় বেটিঙেৰে অনুৰাগীক আপ্লুত কৰিবলৈ সক্ষম হয় ৷ একে সময়তে 28 ছেপ্টেম্বৰৰ পৰা আৰম্ভ হ’বলগীয়া এছিয়ান গেমছৰ বাবে টিম ইণ্ডিয়াৰ দলত নিৰ্বাচিত হৈছে ৷
