চিটাৰা ডেস্ক, ৭ ডিচেম্বৰ: প্ৰয়াত অভিনেত্ৰী শ্ৰীদেৱী আৰু বনী কাপুৰৰ কনিষ্ঠ কন্যা খুশী কাপুৰে আজি ‘দ্য আৰ্চিজ’ ছবিৰ জৰিয়তে বলীউডত আত্মপ্ৰকাশ কৰিছে । শ্বাহৰুখ খানৰ কন্যা সুহানা খান আৰু অমিতাভ বচ্চনৰ নাতি অগস্ত্য নন্দাইও জোয়া আখতাৰৰ পৰিচালনাত নিৰ্মিত এই ছবিখনৰ জৰিয়তে অভিনয় জীৱন আৰম্ভ কৰিছে । ইফালে খুশী কাপুৰৰ পিতৃ বনী কাপুৰে নিজৰ কন্যাৰ প্ৰথমখন ছবিৰ ৰিভিউ ছ’চিয়েল মিডিয়াত শ্বেয়াৰ কৰিছে ।
কন্যা খুশীৰ ছবি ‘দ্য আৰ্চিজ’ৰ সমালোচনা শ্বেয়াৰ কৰিছে বনী কাপুৰে
শেহতীয়াকৈ মুম্বাইত আয়োজন কৰা হৈছিল ৬০ৰ দশকৰ পটভূমিত নিৰ্মিত ছবি 'দ্য আৰ্চিজ'ৰ বিশেষ দৰ্শনী । এই দৰ্শনীত প্ৰায় সকলো বলীউডৰ তাৰকাই অংশগ্ৰহণ কৰিছিল আৰু সকলোৱে 'দ্য আৰ্চিজ'ৰ তাৰকা অভিনেতাৰ কামৰ প্ৰশংসা কৰিছিল । ছবিখনত মুখ্য চৰিত্ৰত অভিনয় কৰা খুশী কাপুৰৰ পিতৃয়ে এতিয়া শ্বেয়াৰ কৰিছে ‘দ্য আৰ্চিছ’ৰ গভীৰ পৰ্যালোচনা ।
বনী কাপুৰে ইনষ্টাগ্ৰামত লিখিছে, "এই ছবিখনে মোক মোৰ স্কুলীয়া দিনলৈ লৈ গৈছে, যেতিয়া আৰ্চিৰ কমিক্স প্ৰতিজন যুৱক-যুৱতীৰ অৱসৰৰ প্ৰিয় সংগী আছিল ৷ জোয়াৰ দ্বাৰা সৃষ্টি কৰা এই পৃথিৱীখনে আমাক অতীতলৈ লৈ গৈছে, প্ৰতিগৰাকী অভিনেতাৰ অভিনয় নিখুঁতভাৱে দেখুওৱা হৈছে, গীতবোৰো একেবাৰে নিখুঁত । সমগ্ৰ ক্ৰুটোৰ প্ৰশংসা কৰিব লাগিব ৷ নেটফ্লিক্সৰ দলটোক এই ছবিখন বাছি লোৱাৰ বাবে ধন্যবাদ ।’’
‘দ্য আৰ্চিজ’ হৈছে কিশোৰ-কিশোৰীৰ মিউজিকেল কমেডী ছবি
জোয়া আখতাৰৰ দ্য আৰ্চিজ কিশোৰ-কিশোৰীৰ মিউজিকেল কমেডী ছবি । এই ছবিখনৰ জৰিয়তে বলীউডত বহু নতুন মুখে আত্মপ্ৰকাশ কৰিছে, ইয়াৰ ভিতৰত আছে সুহানা খান, খুশী কাপুৰ, অগস্ত্য নন্দা, বেদাং ৰাইনা আৰু মিহিৰ আহুজা । এই ছবিখন আজি অৰ্থাৎ ৭ ডিচেম্বৰত OTT প্লেটফৰ্ম Netflix ত মুক্তি দিয়া হৈছে ।
লগতে পঢ়ক: ভাগিনৰ প্ৰথম ছবিক লৈ আবেগিক হৈ পৰিল মোমায়েক অভিষেক বচ্চন
