চিটাৰা ডেস্ক, 3 অক্টোবৰ: বলীউডৰ অভিনেত্ৰী বিপাশা বসু বৰ্তমান মাতৃত্বৰ সময় উপভোগ কৰি আছে । অভিনেত্ৰীগৰাকীয়ে কন্যাৰ সৈতে অতিবাহিত কৰিছে নিজৰ সময় ৷ সেই বাবেই অভিনেত্ৰীগৰাকী বৰ্তমান ছবি জগতৰ পৰা আঁতৰি আছে ৷ অৱশ্যে ছবি জগতৰ পৰা আঁতৰি থাকিলেও অভিনেত্ৰীগৰাকীয়ে নিজৰ ব্যক্তিগত জীৱনৰ সৈতে জড়িত প্ৰায় প্ৰতিটো আপডেট অনুৰাগীৰ বাবে ছ’চিয়েল মিডিয়াত শ্বেয়াৰ কৰি থাকে । ইয়াৰ উপৰিও কন্যা দেৱীৰ সৈতে জড়িত মৰমলগা মুহূৰ্তবোৰো অনুৰাগীৰ সৈতে শ্বেয়াৰ কৰি থাকে বিপাশাই ।
শেহতীয়াকৈ আকৌ এবাৰ বিপাশাই কন্যাৰ সৈতে কটোৱা কিছু বিশেষ মুহূৰ্ত ইনষ্টাগ্ৰাম ষ্ট’ৰীত শ্বেয়াৰ কৰিছে । ২০১৬ চনৰ ৩০ এপ্ৰিলত অভিনেতা কৰণ সিং গ্ৰ’ভাৰৰ সৈতে বিবাহপাশত আবদ্ধ হোৱাৰ পিচত যোৱা বছৰ এই দম্পতীৰ জীৱনলৈ আহে কন্যা দেৱী । কন্যাৰ ১০ মহীয়া জন্মদিন উদযাপনৰ পৰা আৰম্ভ কৰি সত্যনাৰায়ণ পূজাৰ বাবে দেৱীক ৰঙীন লেহেংগা পিন্ধোৱা লৈকে কন্যাৰ বিশেষ মুহূৰ্তবোৰ প্ৰায়ে অনুৰাগীৰ সৈতে শ্বেয়াৰ কৰা দেখা যায় অভিনেত্ৰীগৰাকীক ।
শেহতীয়াকৈ অভিনেত্ৰীগৰাকীয়ে নিজৰ ইনষ্টাগ্ৰাম ষ্ট’ৰীত এটা বুমেৰাং ক্লিপ পোষ্ট কৰিছিল য’ত দেৱীক মাকৰ কোলাত বহি মাকৰ সৈতে খেলা দেখা গৈছে । একেলগে থকা সময়খিনিৰ বিষয়ে অধিক সবিশেষ শ্বেয়াৰ কৰি বিপাশা বসুৱে লিখিছে, “মোক নিজৰ সৰু আঙুলিটো দেখুৱাই খেলিছে ! বেবী চেটাৰবক্স, ঠিক মাকৰ দৰেই ।’’
বিপাশাই দেৱীৰ সৈতে আন এটা ক্লিপ পোষ্ট কৰে, য’ত দেখা গৈছে দেৱীয়ে মাকৰ নাকৰ সৈতে খেলি আছে ৷ এই ক্লিপটো পোষ্ট কৰি অভিনেত্ৰীগৰাকীয়ে লিখিছে, “কোনোবাই মাকৰ নাক ভাল পাইছে, মই জানো যে ই এটা মৰমলগা নাক ৷”
৫০ খনতকৈও অধিক ছবিত কাম কৰিছে বিপাশাই
যদি আমি বিপাশা বসুৰ কেৰিয়াৰৰ কথা কওঁ, তেন্তে ক’ব লাগিব যে অভিনেত্ৰীগৰাকীয়ে নিজৰ কষ্টৰ ভিত্তিত হিন্দী চলচ্চিত্ৰ জগতত নিজৰ নাম বনাবলৈ সক্ষম হৈছে । কেইবাবছৰীয়া কেৰিয়াৰত অভিনেত্ৰীগৰাকীয়ে একাধিক ভাষাৰ ৫০ খনতকৈও অধিক ছবিত অভিনয় কৰিছে । অভিনেত্ৰীগৰাকীয়ে ২০০১ চনত ‘অজনাবী’ ছবিত সহযোগী অভিনেত্ৰী হিচাপে বলীউডত আত্মপ্ৰকাশ কৰে ।
২০০২ চনত মুক্তি পোৱা ভৌতিক থ্ৰিলাৰ ‘ৰাজ’ ছবিখনৰ জৰিয়তে জনপ্ৰিয়তা অৰ্জন কৰিছিল বিপাশাই ৷ ইয়াৰ পিচত জিছম, ৰুদ্ৰাক্ষ, বৰসাত, অপহৰণ, ন’ এণ্ট্ৰি আদি বহু ছবিতো অভিনয় কৰে ৷ ইফালে ২০১৩ চনত ঐতিহাসিক ৰোমান্স ছবি ‘দ্য লাভাৰ্ছ’ৰ জৰিয়তে অভিনেত্ৰীগৰাকীয়ে হলিউডত আত্মপ্ৰকাশ কৰে ৷
