বৰপেটাৰোড, 13 এপ্ৰিলঃ কোকৰাঝাৰ লোকসভা সমষ্টিৰ কংগ্ৰেছী প্ৰাৰ্থী শব্দ ৰাভাই শনিবাৰে বৰপেটাৰোডত এক সংবাদমেল সম্বোধন কৰে ৷ সংবাদ মেলত বিজেপিক সাম্প্ৰদায়িক দল বুলি উল্লেখ কৰি কোকৰাঝাৰ লোকসভা সমষ্টিৰ মিত্ৰজোঁটৰ প্ৰাৰ্থী বিপিএফৰ প্ৰমীলা ৰাণী ব্ৰহ্ম আৰু এবছু সমৰ্থিত ইউপিপিএলৰ প্ৰাৰ্থী উৰ্খাও গৌৰা ব্ৰহ্ম আৰু বৰ্তমানৰ সাংসদ নৱ কুমাৰ শৰণীয়াক সমালোচনা কৰে কংগ্ৰেছ প্ৰাৰ্থী শব্দৰাম ৰাভাই ৷ বিটিচি চুক্তি পুনৰীক্ষণ আৰু বি টি এডিত বসবাস কৰা অবড়ো লোক সকলৰ অধিকাৰ সংসদৰ মজিয়াত বলিষ্ঠ ভাৱে উত্থাপন কৰাৰ শ্লোগানেৰে নিৰ্বাচনত অৱতীৰ্ণ হোৱা বুলি মন্তব্য কৰে কংগ্ৰেছী প্ৰাৰ্থীগৰাকীয়ে ৷
এইবেলিৰ নিৰ্বাচন ভাৰতবৰ্ষৰ জনসাধাৰণৰ এক জটিল নিৰ্বাচন বুলি উল্লেখ কৰি কংগ্ৰেছ প্ৰাৰ্থী শব্দৰাম ৰাভাই কয় সাম্প্ৰদায়িক বিজেপি/ আৰ এছ এছে সমগ্ৰ দেশতে এক ঘৃণাৰ ৰাজনীতি বিয়পাইছে ৷ সেয়ে দেশত সংবিধান বৰ্তাই ৰাখিবৰ বাবে সাম্প্ৰদায়িক শক্তিক পৰাভূত কৰিবই লাগিব ৷ লগতে বিটিএডিত বসবাস কৰা প্ৰতিটো জাতি জনগোষ্ঠীৰ লোকক জীৱন আৰু সম্পত্তিৰ নিৰাপত্তা দিয়াৰ প্ৰতিশ্ৰুতি প্ৰদান কৰে কংগ্ৰেছ প্ৰাৰ্থী শব্দৰাম ৰাভাই ৷ দিল্লীত কংগ্ৰেছৰ চৰকাৰ গঠন হোৱাৰ ছমাহৰ ভিতৰত ছয় জাতি জনগোষ্ঠীক জনজাতি কৰণ কৰা হ'ব বুলিও কয় কংগ্ৰেছ প্ৰাৰ্থী গৰাকীয়ে ৷
সংবাদ মেলত কংগ্ৰেছ প্ৰাৰ্থী গৰাকীয়ে কয় যে, বিটিএডিত বি পি এফে সংঘাতৰ শাসন চলাইছে ৷ বিটিএডিত যেতিয়ালৈকে সংঘাত থাকিব তেতিয়ালৈকে বিকাশ নহয় ৷ সংঘাতৰ অৱসান ঘটাই শান্তি-সম্প্ৰীতিৰে বিটিএডিত বিকাশৰ লগতে সম অধিকাৰ আৰু সম উন্নয়ন হ'ব ৷
সংবাদ মেলত কংগ্ৰেছ প্ৰাৰ্থী শব্দৰাম ৰাভাই আৰু কয় দিল্লীত কংগ্ৰেছৰ চৰকাৰ হলে হাগ্ৰামা মহিলাৰীৰ দূৰ্নীতিৰ তদন্ত কৰি বিটিএডিত বসবাস কৰা অনাবড়ো লোক সকলক ন্যায় প্ৰদান কৰিব ৷ কোকৰাঝাৰৰ বৰ্তমানৰ সাংসদ নৱ কুমাৰ শৰণীয়াই বিগত পাঁচ বছৰত সাংসদ পুজিৰ ২৫ কোটি টকা ক'ত খৰচ কৰিল প্ৰশ্ন উত্থাপন কৰে শব্দ ৰাভাই ৷ নৱ কুমাৰ শৰণীয়াই কমিছনৰ ছিণ্ডিকেট গঢ়ি তোলা বুলি অভিযোগ কৰি কোকৰাঝাৰৰ লোকসভা সমষ্টিৰ ভোটাৰৰ মাজত নৱ কুমাৰ শৰণীয়াৰ অন্য নাম "৬০/৪০" চৰ্চিত হৈছে বুলি বুলিও মন্তব্য কৰে শব্দৰাম ৰাভাই ৷ কোকৰাঝাৰ লোকসভাৰ সকলো বড়ো লোকে বড়োলেণ্ড নিবিচাৰে বুলি উল্লেখ কৰি বহু বড়ো সম্প্ৰদায়ৰ লোকে বিটিএডিত কংগ্ৰেছ দলক সমৰ্থন কৰিছে বুলিও মন্তব্য কৰে কংগ্ৰেছ প্ৰাৰ্থী শব্দৰাম ৰাভাই ৷
