কোকৰাঝাৰ, ২৪ মে': বিগত তিনি দিনে পলাতক হৈ থকা নাবালিকা নিৰ্যাতনকাৰী ৰঘুনাথ নাৰ্জাৰী (55) নামৰ লম্পট জনক অবশেষত আৰক্ষীয়ে আটক কৰিবলৈ সক্ষম হৈছে ৷ কোকৰাঝাৰ সদৰ আৰক্ষীয়ে দেওবাৰে নিশা বিশমুৰী আৰক্ষীৰ সহযোগত বিশমুৰী এলেকাৰে ডিদৌমপাৰা গাঁৱৰ পৰা নাবালিকা এগৰাকীক যৌন নিৰ্যাতন চলোৱাৰ অভিযোগত অভিযুক্ত লোকজনক আটক কৰে ৷
আটকাধীন ৰঘুনাথ নাৰ্জাৰীক সোমবাৰে আদালতত হাজিৰ কৰোৱাৰ পিছত জিলা সদৰ কাৰাগাৰলৈ প্ৰেৰণ কৰা হৈছে ৷ উল্লেখ্য যে, কোকৰাঝাৰ জিলাৰ বিশমুৰী উপ আৰক্ষী চকীৰ অন্তৰ্গত দিডৌমপাৰা গাৱঁৰ এগৰাকী ন বছৰীয়া নাবালিকাক একে গাঁৱৰে ৰঘুনাথ নাৰ্জাৰী নামৰ লম্পট লোকজনে যৌন নিৰ্যাতন চলাই আহিছিল ৷
নাবালিকা গৰাকীয়ে নিজ অভিভাৱকৰ আগত এই বিষয়ে অৱগত কৰাৰ পিছতহে ঘটনাটো পোহৰলৈ আহে ৷ পিছত ভুক্তভোগী নাবালিকা গৰাকীৰ পৰিয়ালে বিশমুৰী আঞ্চলিক এবছুৰ সহযোগত যোৱা 21 মে’ত বিশমুৰী উপ আৰক্ষী চকীত অভিযুক্ত ৰঘুনাথ নাৰ্জাৰী বিৰুদ্ধে এখন এজাহাৰ দাখিল কৰে ৷ উল্লেখ্য যে, ঘটনাটো পোহৰলৈ অহাৰ পিছৰে পৰা লম্পট ৰঘুনাথ নাৰ্জাৰী পলাতক হৈ আছিল ৷
লগতে পঢ়ক : অসমীয়া ছবি পৰিচালক দাৰা আহমেদ আৰু নাই
