বৰপেটা, 31 জুলাই : বৰপেটা জিলা (Barpeta District)ৰ মাজদিয়া আৰক্ষী চকীৰ অন্তৰ্গত বৰফালাদীত শুকুৰবাৰে সংঘটিত হয় এক শোকৱহ ঘটনা । পুখুৰীত মাছ মৰাক কেন্দ্ৰ কৰি দুই ফৈদৰ মাজত সংঘটিত হয় ভয়ংকৰ মাৰপিটৰ ঘটনা । দলবদ্ধ আক্ৰমণত একেখন ঘৰৰ তিনিগৰাকী ভাতৃ গুৰুতৰভাৱে আহত হয় । আহত তিনিগৰাকী হ'ল বৰফালাদীৰ মহিৰুদ্দিনৰ পুত্ৰ চাদ্দাম আলী, জেহেৰুল ইছলাম আৰু মনোৱাৰ হুছেইন ।
অভিযোগ অনুসৰি, মহিৰুদ্দিনৰ পুখুৰীত একেগাঁৱৰে বাহাৰুদ্দিন আৰু চুবুৰ আলীৰ পৰিয়ালৰ লোকে বলপূৰ্বক মাছ মাৰিছিল । মাছ মৰাত বাধা প্ৰদান কৰিবলৈ যাওঁতে মহিৰুদ্দিনৰ পুত্ৰ মনোৱাৰ হুছেইনক বাহাৰুদ্দিন আৰু চবুৰ আলীৰ পুত্ৰই লগ লাগি চোকা অস্ত্ৰৰে আঘাত কৰে ৷ ফলত গুৰুতৰভাবে আহত হয় মনোৱাৰ হুছেইন ।
লগতে পঢ়ক - কলগাছিয়াত ধনৰ বিনিময়ত ফলাফল বিসংগতিৰ অভিযোগ পৰীক্ষাৰ্থীৰ
এই খবৰ পোৱাৰ পিছত মহিৰুদ্দিনৰ আন দুই পুত্ৰ চাদ্দাম আলী আৰু জেহেৰুল ইছলামে ঘটনাস্থলীত উপস্থিত হোৱাত তেওঁলোককো বাহাৰুদ্দিন আৰু চুবুৰ আলীৰ ফৈদটোৱে চোকা অস্ত্ৰৰে দলবদ্ধভাৱে পুনৰ আক্ৰমণ কৰে ৷
আনহাতে, গুৰুতৰভাৱে আহত তিনিওগৰাকী ভাতৃক প্ৰথমতে চেঙা খণ্ড প্ৰাথমিক স্বাস্থ্য কেন্দ্ৰত ভৰ্তি কৰোৱা হয় ৷ কিন্তু পৰৱৰ্তী সময়ত অৱস্থাত উন্নত চিকিৎসাৰ বাবে তিনিওকে বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হাস্পতাল (Fakhruddin Ali Ahmed College Hospital)লৈ প্ৰেৰণ কৰা হয়। উক্ত ঘটনাটো সন্দৰ্ভত স্থানীয় লোকে আৰক্ষীক অৱগত কৰে ৷
ঘটনাস্থলীত ততালিকে মাজদিয়া আৰক্ষী আৰু সৰ্থেবাৰী আৰক্ষী উপস্থিত হৈ তদন্ত আৰম্ভ কৰে । আনহাতে, আক্ৰমণকাৰী বাহাৰুদ্দিন আৰু চুবুৰ আলীসহ পৰিয়ালৰ লোকে পলাতক হৈ আছে বুলি জানিব পৰা গৈছে । অতি শীঘ্ৰে আক্ৰমণকাৰীক আটক কৰি উচিত শাস্তি প্ৰদান কৰিবলৈ আৰক্ষীক আহ্বান জনাইছে স্থানীয় ৰাইজে ।
