ডুমডুমা, 4 জুনঃ তিনিচুকীয়া জিলাৰ বাঘজানৰ তৈলখাদ ঘেৰাও কৰি ৰাইজে তীব্ৰ প্ৰতিবাদ সাব্যস্ত কৰে । চৰকাৰৰ বিৰুদ্ধে বিভিন্ন শ্ল'গান দি পৰিৱেশ উত্তাল কৰে প্ৰতিবাদকাৰী সকলে ৷
তিনিচুকীয়াৰ বাঘজান তৈল খাদত অহৰহ গেছ নিৰ্গত হোৱা কাণ্ডৰ বিৰুদ্ধে ইতিমধ্যে বিভিন্ন দল সংগঠনে তীব্ৰ প্ৰতিবাদ সাব্যস্ত কৰিছে ৷ ইতিমধ্যে,উক্ত তৈল খাদৰ পৰা নিৰ্গত হোৱা গেছে বিভিন্ন জীৱ-জন্তুৰ লগতে গছ-গছনি ধ্বংস কৰিছে ৷ আনহাতে,তৈল খাদৰ দাঁতিকাষৰীয়া অঞ্চলৰ লোকসকলে ঘৰ দুৱাৰ এৰি আশ্ৰয় শিবিৰ লৈ স্থানান্তৰ হ'বলগীয়া পৰিস্থিতিৰ সৃষ্টি হৈছে ৷ আনহাতে,নৱম দিনলৈকে অব্যাহত আছে বাঘজান তৈলখাদৰ পৰা এতিয়াও প্ৰশমিত হোৱা নাই গেছৰ নিৰ্গমণ । তৈল খাদৰ পৰা নিৰ্গত হোৱা গেছ বন্ধ কৰিবলৈ সক্ষম হোৱা নাই অইল ইণ্ডিয়া কৰ্তৃপক্ষ ৷ তাৰোপৰি,বিভিন্ন দল সংগঠনৰ উপৰিও বাঘজানৰ ৰাইজে 4 জুনলৈকে গেছ ওলোৱা বন্ধ কৰিবলৈ উপযুক্ত ব্যৱস্থা কৰিবলৈ সময়সীমা বান্ধি দিছিল ৷ কিন্তু বিফল হয় অইল কৰ্তৃপক্ষ ৷ আনহাতে অইল ইণ্ডিয়া কৰ্তৃপক্ষই আশ্ৰয় শিবিৰত থকা লোক সকলৰ দাবীৰ প্ৰতিও কোনোধৰণৰ গুৰুত্ব নিদিয়াৰ প্ৰতিবাদত বৃহস্পতিবাৰে ৰাজপথলৈ ওলাই আহে বাঘজানৰ আশ্ৰয় শিবিৰত থকা হাজাৰ-হাজাৰ লোক । বাঘজানবাসী ৰাইজৰ দাবীৰ প্ৰতি চৰকাৰ তথা অইল ইণ্ডিয়া কৰ্তৃপক্ষই কোনোধৰণৰ গুৰুত্ব নিদিয়াৰ প্ৰতিবাদত আজি আশ্ৰয় শিবিৰৰ পৰা বাঘজান তৈলখাদলৈকে বৃহত প্ৰতিবাদী কাৰ্যসূচীৰে প্ৰতিবাদ সাব্যস্ত কৰে লোকসকলে । প্ৰতিবাদকাৰী সকলে "অইল ইণ্ডিয়া গ' বেক, অইলৰ CMD মুৰ্দাবাদ,অসম চৰকাৰ হায়-হায় আদি বিভিন্ন শ্ল'গানেৰে তীব্ৰ প্ৰতিবাদ সাব্যস্ত কৰে। ইফালে, তাৎক্ষণিকভাৱে ক্ষতিগ্ৰস্ত প্ৰতিটো পৰিয়ালক উপযুক্ত ক্ষতিপূৰণ প্ৰদান নকৰিলে তৈলখাদতেই আত্মজাহৰ হুংকাৰ প্ৰদান কৰে প্ৰতিবাদকাৰী সকলে । অন্যহাতে,কেন্দ্ৰীয় মন্ত্ৰী যোগেন মোহনে শিহুৰ লগতে মাছ-কাছ মৃত্যুৰ কাৰণ সম্পৰ্কে কৰা বিতৰ্কিত মন্তব্যৰ স্পষ্টীকৰণ প্ৰদান কৰিবলৈও দাবী জনাইছে প্ৰতিবাদকাৰীসকলে ।
লগতে পঢ়ক- পাণবজাৰ এপেক্স বেংকৰ প্ৰৱন্ধকক সকীয়নি লাচিত সেনাৰ
