তিনিচুকীয়া, 6 ডিচেম্বৰঃ তিনিচুকীয়াৰ বৰগুৰিস্থিত সদৌ মৰাণ ছাত্ৰ সন্থাৰ মুখ্য কাৰ্যালয়ৰ বদৌচা ভৱনত সদৌ মৰাণ ছাত্ৰ সন্থাৰ সহযোগত দেওবাৰে এখনি কাৰ্যনিৰ্বাহক সভা অনুষ্ঠিত হয় ৷ সভাত প্ৰাক্তন সভাপতি অৰুণজ্যোতি মৰাণক এখনি চেলেং চাদৰ, শৰাই আৰু এখনি মানপত্ৰ দি বিদায় সম্ভাষণ জনোৱা লগতে নৱ নিৰ্বাচিন প্ৰতিনিধিসকলে শপত গ্ৰহণ কৰে ।
উক্ত সভাতেই প্ৰাক্তন সভাপতি অৰুণজ্যোতি মৰাণে নৱ-নিৰ্বাচিত সভাপতি নৱ মৰাণক সকলো দায়িত্বভাৰ অৰ্পণ কৰে । ইয়াৰ পিচতে বদৌচা ভৱনৰ পৰা সভা ভংগ কৰি এক বিশাল বাইক ৰেলী কৰি মাকুমৰ ৰজনীকান্ত বৰদলৈ খেলপথাৰত উপস্থিত হয় আৰু তাতে অৰুণজ্যোতি মৰাণক আনুষ্ঠানিক বিদায় সম্ভাষণৰ অনুষ্ঠান আয়োজন কৰা হয় ।
বিদায়ী অনুষ্ঠানটোত সংগঠনটোৰ প্ৰাক্তন সভাপতি অৰুণজ্যোতি মৰাণে যথেষ্ট আৱেগিক হৈ পৰে আৰু চকুলো নিগৰে । অনুষ্ঠানটোত সদৌ মৰাণ ছাত্ৰ সন্থাৰ নৱ-নিৰ্বাচিত সমিতিৰ সকলো কৰ্মকৰ্তা, অসম মৰাণ সভাৰ বিষয়ববীয়াৰ লগতে মৰাণ জনজাতিৰ আটাইকেইটা সংগঠনৰ বিষয়ববীয়া উপস্থিত থাকে।
লগতে পঢ়কঃঅসমৰ যি বিকাশ আৰু উন্নয়ন হৈছে সেয়া অগপৰ বাবে হৈছেঃ প্ৰফুল্ল কুমাৰ মহন্ত
