তিনিচুকীয়া, 15 আগষ্ট : সমগ্ৰ দেশৰ লগতে তিনিচুকীয়া আই টি আই খেলপথাৰত আনুষ্ঠানিকভাৱে উদযাপন কৰা হয় দেশৰ 75 সংখ্যক স্বাধীনতা দিৱস । কটকটীয়া নিৰাপত্তা বেষ্টনীৰ মাজতে ক’ভিড প্ৰট'কল মানি অনাড়ম্বৰপূৰ্ণ ভাৱে আনুষ্ঠিত কৰা হয় স্বাধীনতা দিৱসৰ অনুষ্ঠান ।
উক্ত অনুষ্ঠানত মুখ্য অতিথি হিচাপে উপস্থিত থাকে অসম চৰকাৰৰ ৰাজহ আৰু দুৰ্যোগ ব্যৱস্থাপনা মন্ত্ৰী যোগেন মহন, তিনিচুকীয়া জিলা উপায়ুক্ত পাৱাৰ নৰ্ছিং সম্ভাজীৰ লগতে জিলাখনৰ বিভিন্ন গণ্য-মান্য ব্যক্তিসকল । দেওবাৰে পুৱা 9 বজাত তিনিচুকীয়া আই টি আই খেলপথাৰত অসম চৰকাৰৰ ৰাজহ আৰু দুৰ্যোগ ব্যৱস্থাপনা মন্ত্ৰী যোগেন মহনে আনুষ্ঠানিক ভাৱে জাতীয় পতাকা উত্তোলন কৰে ।
অসম আৰক্ষীৰ মাৰ্চ পেৰেড আৰু কুচ কাৱাজৰ অভিবাদন হোৱাৰ লগতে ভাৰতীয় সেনাৰ অস্ত্ৰ প্ৰদৰ্শন আৰু বাৰেৰহণীয়া সাংস্কৃতিক অনুষ্ঠান আয়োজন কৰা হয় ।
মন্ত্ৰী গৰাকীয়ে ভাষণৰ প্ৰসংগত কেন্দ্ৰীয় আৰু ৰাজ্য চৰকাৰৰ বিভিন্ন উন্নয়নমূলক আঁচনিৰ খতিয়ানসমূহ তুলি ধৰে ৷ ইয়াৰ উপৰিও স্বাধীনতা দিৱসৰ কাৰ্যসূচীতে তিনিচুকীয়া জিলাৰ বিভিন্ন বিশিষ্ট ব্যক্তিক সম্বৰ্ধনা জনোৱা হয় ।
