তেজপুৰ, 10 নৱেম্বৰ : প্ৰথমবাৰৰ বাবে প্ৰতিৰক্ষা মন্ত্ৰালয়ে ইয়াৰ অধীনস্থ সৈনিক স্কুলত ছাত্ৰীৰ কাৰণে মুকলি কৰিলে নামভৰ্তিৰ জাননী ৷ দেশৰ মুঠ ছখন বিদ্যালয়ত ছাত্ৰীৰ নামভৰ্তি হ'ব ৷
সেই অনুসৰি, অসমৰ গোৱালপাৰা জিলাস্থিত সৈনিক স্কুলৰ বাবেও জাৰী কৰা হৈছে নামভৰ্তিৰ জাননী ৷ সপ্তম শ্ৰেণীৰ নামভৰ্তিৰ বাবে অহা 2021-22 বৰ্ষৰ নামভৰ্তিৰ প্ৰ-পত্ৰ দাখিলৰ অন্তিম দিন অহা 19 নৱেম্বৰ বুলি জনাইছে ভাৰতীয় সেনাৰ মুখপাত্ৰ লেফ্টনেন্ট কৰ্ণেল পি খোনচাই । এই প্ৰ-পত্ৰৰ বাবে যাৱতীয় তথ্য https://www.sainikschooltvm.nic.in/ ৱেবচাইটত উপলব্ধ হৈছে ৷
1964 চনত স্থাপন হোৱা গোৱালপাৰা সৈনিক স্কুলৰ 300ৰো অধিক প্ৰাক্তন ছাত্ৰ ভাৰতীয় সেনা আৰু বিভিন্ন ক্ষেত্ৰৰ লগত জড়িত হৈ আছে আৰু দেশৰ উচ্চ পৰ্যায়ৰ আসন দখল কৰিছে । লগতে দেশৰ ভাৰতীয় প্ৰশাসনিক বিষয়া,ভাৰতীয় আৰক্ষী সেৱা,অসম প্ৰশাসনিক সেৱা আদিত কাম কৰি আছে ।
আনহাতে প্ৰথমবাৰৰ বাবে দেশৰ ছখন সৈনিক স্কুলত ছাত্ৰীৰ নামভৰ্তিৰ বাবেও আগন্তুক শিক্ষাবৰ্ষৰ নামভৰ্তিৰ জাননী জাৰী কৰা হৈছে ৷ এইকেইখন স্কুল হৈছে কালিকিৰি (অন্ধ্ৰ প্ৰদেশ), কোদাগু (কৰ্নাটক), ঘোৰাখাল (উত্তৰাখণ্ড), চন্দ্ৰপুৰ (মহাৰাষ্ট্ৰ), বিজাপুৰ (কৰ্নাটক) আৰু বালাচান্দি (গুজৰাট) ৷
লগতে পঢ়ক : জালুকবাৰী আয়ুৰ্বেদিক চিকিৎসালয়ত এটা ক'ভিড স্কেনিং চেন্টাৰ মুকলি
