তেজপুৰ,17 অক্টোবৰ: তেজপুৰ চহৰৰ পাঁচ মাইলৰ বিহীয়াত বৃহস্পতিবাৰে সংঘতিত হ'ল এক ভয়াৱহ নাও দুৰ্ঘটনা ৷ জীয়াভৰলীৰ বুকুত ডুব গ'ল বিহিয়া গাঁও চাপৰিৰ পৰা তেজপুৰ পাঁচ মাইলৰ সপ্তাহিক বজাৰলৈ প্ৰায় 50 জন যাত্ৰীসহ 8খন মটৰচাইকেল আৰু গৰু কঢ়িয়াই অনা এখন মেছিন নাও ৷ এই ভয়াৱহ দুৰ্ঘটনাত বাকী কেইগৰাকী যাত্ৰীয়ে সাঁতুৰি নিজৰ প্ৰাণ ৰক্ষা কৰিবলৈ সক্ষম হয় যদিও জীয়াভৰলীৰ বুকুত সন্ধানহীন হয় এজন লোক ৷ সন্ধানহীন লোকজনৰ নাম টাইজোত আলী বুলি আৰক্ষীৰ সূত্ৰত প্ৰকাশ ৷ আহত সকলৰ ভিতৰত দুগৰাকী মহিলাক আৰক্ষীয়ে উদ্ধাৰ কৰি ইতিমধ্যে উন্নত চিকিৎসাৰ বাবে তেজপুৰ মেডিকেল কলেজ হাস্পতাললৈ প্ৰেৰণ কৰে ৷
ইফালে বিয়লি সন্ধানহীন লোকজনৰ সন্ধানত ঘটনাস্থলীত এছ ডি আৰ এফৰ এটা দল উপস্থিত হৈ উদ্ধাৰ অভিযান চলাই যদিও সন্ধানহীন টাইজোত আলীৰ শুংসুত্ৰ লাভ কৰিবলৈ অসমৰ্থ হয় ৷ উল্লেখযোগ্য যে,ঘটনা সংঘটিত হোৱা জীয়াভৰলী নদীৰ সেই স্থানৰ ওপৰত এখন দলঙৰ বাবে 20 বছৰ আগতেই কেন্দ্ৰীয় চৰকাৰে অনুমোদন জনাইছিল যদিও আজি পৰ্যন্ত সেয়া হৈ নুঠিল ৷ যাৰ ফলত মেছিন নাৱেৰে এক ভয়ংকৰ বিপদসংকুল যাত্ৰা অব্যাহত ৰাখিব লগা হৈছে বিহীয়া চাপৰিৰ ৰাইজে ৷
