শিলচৰ,11 এপ্ৰিল: শিলচৰ চহৰত এদল যুৱকে সুুৰাপান কৰি ৰাজপথত চলায় ৷ যুৱকৰ দলটোৰ আক্ৰমণত আৰক্ষীসহ 7 গৰাকীকৈ ব্যক্তি গুৰুতৰভাৱে আহত হয় ৷ শনিবাৰে নিশা শিলচৰ চহৰৰ চেংকুৰি অঞ্চলত যুৱকৰ দলটোৱে চলাই এই আক্ৰমণ ৷ হাতত বাঁহ, চোকা অস্ত্ৰ লৈ কৰা আক্ৰমণৰ দৃশ্য ইতিমধ্যে কেমেৰাত বন্দী হৈছে ৷
জানিব পৰা মতে, নিশা সুৰাপায়ী যুৱকৰ দলটোৰ মাজত কোনো বিষয়ক লৈ কাজিয়াৰ সূত্ৰপাত ঘটে ৷ পৰৱৰ্তী সময়ত ৰাজপথতে হতাহতিত লিপ্ত হয় যুৱকৰ দলটো ৷ সাধাৰণ পথচাৰী কেইজনে কাজিয়া ভাঙিবলৈ আগবাঢ়ি অহাত যুৱকৰ দলটোৱে পথচাৰীসকলৰ ওপৰত আক্ৰমণ চলায় ৷ যাৰ ফলত গুৰুতৰভাৱে আহত হয় এগৰাকী আৰক্ষীসহ 7 গৰাকীকৈ লোক ৷ আহত কেইজন বৰ্তমান চিকিৎসালয়ত চিকিৎসাধীন হৈ আছে ৷
ইপিনে ঘটনাক লৈ শিলচৰ ৰাষ্ট্ৰীয় ঘাইপথ আৰক্ষী চকীত তিনিখনকৈ এজাহাৰ দাখিল কৰা হৈছে ৷ এজাহাৰৰ ভিত্তিতে আৰক্ষীয়ে টিটু দাস নামৰ এজন যুৱকক আটক কৰে ৷
লগতে পঢ়ক: বৰপেটা জিলা কংগ্ৰেছৰ সাধাৰণ সম্পাদকৰ পদত্যাগ
