নলবাৰী, ১৭ মাৰ্চঃ মাদক দ্ৰব্যৰ বিৰুদ্ধে নলবাৰীৰ ৰাজপথত এজাক মহিলা ৷ দেওবাৰে স্থানীয় দক্ষিণ কেন্দুকুছি মহিলা সমিতিৰ উদ্যোগত কেন্দুকুছি গাঁওৰ মহিলাসকলে মাদক দ্ৰব্য আৰু নাৰী নিৰ্যাতনৰ বিৰুদ্ধে ব্যাপক প্ৰতিবাদ সাব্যস্ত কৰে ৷
কেন্দুকুছি গাঁওৰ মহিলাসকলে স্থানীয় আৰক্ষী বিষয়া বুলবুল হুছেইনৰ সহযোগত আৰক্ষী আৰু অৰ্ধসামৰিক বাহিনীৰ দল লগত লৈ গাঁওখনৰ বিভিন্ন স্থানত চুলাই বিৰোধী অভিযানৰ লগতে এক সজাগতা সমদল বাহিৰ কৰে ৷ সমদলত গাঁওখনৰ বহুসংখ্যক মহিলাৰ লগতে স্থানীয় সচেতন ব্যক্তিসকলে অংশগ্ৰহণ কৰে ৷
মাদক দ্ৰব্যৰ বিৰুদ্ধে প্ৰতিবাদ
মহিলাসকলে গাঁওখনৰ বিভিন্ন স্থানত চুলাই ব্যৱসায়ীসকলৰ ঘৰে ঘৰে গৈ উচ্ছেদ অভিযান চলায় ৷ অভিযানৰ সময়তে চুলাই ব্যৱসায়ীসকলৰ সৈতে খণ্ডযুদ্ধটো লিপ্ত হয় মহিলাসকল ৷ পৰৱৰ্তী সময়ত মহিলাসকলে মদ প্ৰস্তুত কৰা সামগ্ৰীৰ লগতে বহু লিটাৰ চুলাই মদ ধ্বংস কৰে ৷
