চামগুৰি, 18 ছেপ্তেম্বৰ: শ্বহীদৰ কেঁচা তেজেৰে ধোৱা, শ্বহীদ ভূমি নগাঁৱৰ বঢ়মপুৰৰ 1942 চনৰ চাৰিগৰাকীকৈ শ্বহীদৰ স্মৃতিত প্ৰতিবছৰে 18 ছেপ্তেম্বৰৰ দিনটোত শ্বহীদ দিৱস হিচাপে পালন কৰি অহা হৈছে ৷ উল্লেখযোগ্য যে, 1942 ৰ 18 ছেপ্তেম্বৰৰ কথা নগাঁৱৰ বঢ়মপুৰৰ বটবৃক্ষৰ তলত স্বাধীনতা সংগ্ৰামী সকল একগোট হৈ আয়োজন কৰিছিল ভোজ-ভাতৰ ৷
সেই খবৰ পৰিছিলগৈ বৃটিছ বাহিনীৰ কাণত ৷ খবৰ লাভ কৰিয়েই বঢ়মপুৰত উপস্থিত হৈছিল বৃটিছ বাহিনী ৷ আৰম্ভ হৈছিল বৃটিছ বাহিনী আৰু স্বাধীনতা সংগ্ৰামীৰ মাজত তৰ্কযুদ্ধ ৷ তাৰ পাছতেই নিবিৰ্চাৰ ভাৱে গুলীচালনা কৰিছিল বৃটিছ বাহিনীয়ে ৷
সেই বৃটিছৰ গুলীত আঘাটপ্ৰাপ্ত হৈ শ্বহীদ হৈছিল থগী সুত, লক্ষী হাজৰিকা আৰু বলো সুত ৷ ইপিনে সেইদিনা বৃটিছৰ গুলীত গুৰুতৰ ভাৱে আঘাটপ্ৰাপ্ত হৈছিল ভোগেশ্বৰী ফুকননী ৷ জীৱন মৃত্যুৰে যুঁজি অৱশেষত 20 ছেপ্তেম্বৰত মৃত্যুক সাৱটি লয় ভোগেশ্বৰী ফুকননীয়ে ৷
লগতে পঢ়কঃ কলগাছিয়াত আমছুৱে দাহ কৰিলে শিক্ষামন্ত্ৰীৰ পুত্তলিকা
এই চাৰিগৰাকী শ্বহীদৰ স্মৃতি সজীৱ কৰি ৰাখিবৰ বাবেই প্ৰতিবছৰে ১৮ ছেপ্তেম্বৰ দিনটোত শ্বহীদ দিৱস হিচাপে পালন কৰি অহা হৈছে । আজি অৰ্থ্যাৎ শনিবাৰে বিভিন্ন কাৰ্যসূচীৰে নগাঁৱৰ বঢ়মপুৰত উদযাপন কৰা হৈছে শ্বহীদ দিৱস ।
আনহাতে এই শ্বহীদ দিৱসত শনিবাৰে পুৱা ৯ বজাত অসম প্ৰদেশ কংগ্ৰেছ কমিটীৰ সভাপতি ভূপেন বৰা, সাংসদ গৌৰৱ গগৈ, প্ৰদুৎ বৰদলৈসহ কংগ্ৰেছৰ এটা প্ৰতিনিধি দল বঢ়মপুৰত উপস্থিত হৈ কংগ্ৰেছৰ উদ্যোগত আয়োজিত শ্বহীদ দিৱসৰ এই কাৰ্যসূচীত অংশগ্ৰহণ কৰে ।
ইপিনে দিনৰ ভাগত মন্ত্ৰী কেশৱ মহন্ত, বিমল বৰা, পীযুষ হাজৰিকা, বিধায়ক ৰূপক শৰ্মাই শ্বহীদ দিৱসৰ এই কাৰ্যসূচীত অংশগ্ৰহণ কৰে বুলি জানিব পৰা গৈছে ।
লগতে পঢ়কঃ বিজেপিয়ে ঘোষণা কৰিলে ৰাজ্যসভাৰ উপ-নিৰ্বাচনৰ প্ৰাৰ্থীৰ তালিকা
