নলবাৰী, 1 আগষ্টঃ নলবাৰীত সংঘটিত হৈছে এটা আজৱ ঘটনা ৷ ইতিমধ্যে নলবাৰী শ্বহীদ মুকুন্দ কাকতি অসামৰিক চিকিৎসালয়ৰ এগৰাকী GNM নাৰ্ছৰ স্বামী সহ পৰিয়ালৰ তিনি সদস্যৰ দেহত ধৰা পৰিছে ক'ভিড প'জিটিভ ৷
ইফালে বৰ্তমান নলবাৰী শ্বহীদ মুকুন্দ কাকতি অসামৰিক চিকিৎসালয়ৰ প্ৰসুতি বিভাগৰ Baby ICUত কৰ্মৰত নাৰ্ছ গৰাকী ৷ নাৰ্ছ গৰাকীৰ নাম নন্দা কলিতা ৷ এইগৰাকী নাৰ্ছৰ স্বামী,শহুৰ আৰু শাহুসহ পৰিয়ালৰ তিনি সদস্য কভিড পজিটিভ হোৱাৰ পিছত আটাইকে নলবাৰী অসামৰিক চিকিৎসালয়ত ভৰ্তি কৰাইছে স্বাস্থ্য বিভাগে ৷ কিন্তু ৰহস্যজনক কথাটো হ’ল পৰিয়ালৰ তিনি সদস্যৰ দেহত ক'ভিড প'জিটিভ ওলোৱাৰ পিছতো আজিলৈকে পৰিয়ালৰ আন লোক অথবা ঘৰখন কৰা নহ’ল কন্টেইনমেন জ'ন ৷ আনকি নাৰ্ছ গৰাকীও ছয়মহীয়া অন্তঃসত্ত্বা ৷ স্বাস্থ্য বিভাগে নাৰ্ছ গৰাকীৰ ৰেপিড টেষ্ট কৰাৰ পিছত কৰাইছে স্বাৱ টেষ্ট ৷ কিন্তু স্বাৱ টেষ্টৰ ৰিজাল্ট নহাকৈয়ে নাৰ্ছ গৰাকীক হস্পিতাল কৰ্তৃপক্ষই নিয়োজিত কৰিছে কাম-কাজত ৷ শনিবাৰেও নাৰ্ছ গৰাকীয়ে Baby ICU ত কৰ্তব্য পালন কৰি থকা দেখা গৈছে ৷ মাথো স্বাস্থ্য বিভাগৰ কৰ্তব্যক দোহাই দি চিকিৎসালয় কৰ্তৃপক্ষই এনেদৰে নাভূত-নাশ্ৰুত ভাৱে নিয়োজিত কৰি ৰাখিছে নাৰ্ছ গৰাকীক ৷ উক্ত ঘটনাৰ বাবে এতিয়া শংকিত হৈ পৰিছে একাংশ সচেতন মহল ৷
