নলবাৰী, 5 আগষ্ট : এখন বিশেষ চাইকেলে নলবাৰীত (NALBARI) ব্যাপক চৰ্চা লাভ কৰিছে ৷ চাইকেলখন (cycle ) সাজি উলিয়াইছে এজন ছাত্ৰই ৷ যি সময়ত ক’ৰণাকালীন পৰিস্থিতিৰ (COVID-19 SITUATIONS) বাবে ছাত্ৰ-ছাত্ৰী সকল ঘৰতে আৱদ্ধ হৈ থাকিব লগীয়া হৈছে ৷ সেই সময়তে একাংশ ছাত্ৰ-ছাত্ৰীয়ে সময়ৰ সদব্যৱহাৰ কৰা দেখা গৈছে ৷ তেনে এক ব্যতিক্ৰমধৰ্মী কাম কৰিয়েই এতিয়া চৰ্চাৰ বিষয় হৈ পৰিছে ছাত্ৰজন ৷
ছাত্ৰজন হৈছে নলবাৰী জিলাৰ আমনি গাঁৱৰ কৃষক জমিৰ উদ্দিন আহমেদৰ পুত্ৰ জিতু উদ্দিন আহমেদ (JITU UDDIN AHMED) ৷ জিতু উদ্দিন আহমেদে লক ডাউনৰ (LOCK DOWN) সময়ছোৱাত ঘৰতে থাকি নিজ হাতেৰে সাজি উলিয়াইছে এখন বিশেষ চাইকেল ৷ বিশেষ মানে এখন কাঠৰ চাইকেল (Wood Cycle ) জিতু উদ্দিন আহমেদে সাজি উলিয়াইছে ৷ সাধাৰণ চাইকেলৰ দৰেই এই কাঠৰ চাইকেলখন চলাই ঘূৰি ফুৰিব পাৰি ৷
ইপিনে কাঠৰ চাইকেলখন যেতিয়াই জিতু উদ্দিন আহমেদে চলাবৰ বাবে উলিয়াই লৈ যায় তেতিয়াই বাটৰুৱা আৰু স্থানীয় লোকে ৰৈ ৰৈ চায় আৰু চাইকেলখনৰ সৈতে ছেলফি উঠিবলৈ আগ্ৰহ কৰে ৷
উল্লেখযোগ্য যে, প্ৰথম বাঁহেৰে চাইকেল সাজিবলৈ চেষ্টা কৰি ব্যৰ্থ হৈছিল জিতু উদ্দিন আহমেদ ৷ কিন্তু হাৰ মনা নাছিল নাছিল জিতুৱে ৷ প্ৰৱল ইচ্ছাশক্তিৰ বলত অসাধ্য সাধন কৰি অৱশেষত কাঠেৰে সাজি উলিয়াবলৈ সক্ষম হৈছে আকৰ্ষণীয় এখন কাঠৰ চাইকেল ।
কেৱল কাঠৰ চাইকেলেই নহয় জিতুৱে নিজে হাতে সাজি উলিয়াইছে গীটাৰ, বাঁহী ইত্যাদি বাদ্যযন্ত্ৰ । সম্প্ৰতি এইদৰে কাঠৰ চাইকেল সাজি বিশেষভাৱে চৰ্চালৈ অহা জিতুৱে ভৱিষ্যতে এখন কাঠৰ চাৰিচকীয়া বাহন সাজিবলৈ পৰিকল্পনা কৰিছে বুলি জানিবলৈ দিছে ৷
লগতে পঢ়ক : কাক ‘উগ্ৰপন্থী’ সজালে বিধানসভাৰ অধ্যক্ষই ?
