নগাঁও,1 নৱেম্বৰ : নগাঁৱৰ মধ্যাহ্ন ভোজন ৰান্ধনী সন্থাৰ প্ৰতিবাদস্থলীত সৃষ্টি হ'ল উত্তপ্ত পৰিস্থিতি। শুকুৰবাৰে পুৱাৰ ভাগত নগাঁৱৰ কৰ্মীসকলে তীব্ৰ প্ৰতিবাদ সাব্যস্ত কৰি অৱৰোধ কৰিছিল নগাঁও-লাওখোৱা পথ। প্ৰতিবাদ তীব্ৰতৰ হোৱাত আৰক্ষী আৰু প্ৰতিবাদকাৰীৰ মাজত হতাহতিৰ সৃষ্টি হয় ৷ ইয়াৰ পাচতে সংঘটিত এক দুৰ্ঘটনাত আহত হয় এগৰাকী মহিলা আৰক্ষী ৷ প্ৰতিবাদ নিয়ন্ত্ৰণ কৰিবলৈ যোৱা মহিলা আৰক্ষী গৰাকীক এখন তীব্ৰবেগী বাহনে ভৰিত খুন্দিয়াই গুৰুতৰভাৱে আহত কৰে ৷
একেদৰে ওদালগুৰিৰ ৰৌতাতো এন জি অ'ক মধ্যাহ্ন ভোজনৰ দায়িত্ব দিয়াৰ বিৰুদ্ধে প্ৰতিবাদ সাব্যস্ত কৰে মধ্যাহ্ন ভোজন ৰান্ধনী সহায়িকা সন্থাই ৷ মধ্যাহ্ন ভোজনৰ দায়িত্ব লাভ কৰা পাৰস এগ্ৰ' চ'ছাইটিৰ ৰন্ধন ঘৰ ঘেৰাও কৰে কৰ্মীসকলে ৷
আনহাতে, চিৰাঙৰ ছাপাগুৰিতো চাকৰি হেৰুওৱা মধ্যাহ্ন ভোজন কৰ্মীসকলে সাব্যস্ত কৰে তীব্ৰ প্ৰতিবাদ ৷ 'বাল ৰসোই' নামৰ বেচৰকাৰী সন্থাই মধ্যাহ্ন ভোজনৰ ঠিকা লাভ কৰাৰ পাচতে ক্ষুণ্ণ হৈ পৰে কৰ্মীসকল ৷ বেচৰকাৰী সংস্থাটোৰ কাৰ্যালয়ৰ সন্মুখৰ ছাপাগুৰীৰ 31নং ৰাষ্ট্ৰীয় ঘাইপথত শুকুৰবাৰে পুৱাৰ পৰা প্ৰতিবাদ সাব্যস্ত কৰে প্ৰতিবাদকাৰীসকলে ৷
