নগাঁও, 16 আগষ্ট : অসমীয়া ভাষা বিৰোধী বিস্ফোৰক মন্তব্য কৰা প্ৰাক্তন বিধায়ক তথা বিজেপি নেতা আব্দুল আজিজ বিৰোধী ধ্বনিৰে উত্তাল হৈ পৰে নগাঁৱৰ ৰূপহীহাট (Protest in Nagaon against Abdul Aziz) । 76 সংখ্যক স্বাধীনতা দিৱসৰ দিনাই হাতীপুখুৰী টি এন ইংলিছ একাডেমীত পতাকা উত্তোলন কৰি অসমীয়া ভাষা বিদ্ধেষী মন্তব্য আগবঢ়াই এক নতুন বিতৰ্কৰ সূচনা কৰে আব্দুল আজিজে ।
ভাষণ প্ৰসংগত শ্লেষাত্মক ভাষাৰে অসমীয়াক মাতৃভাষা হিচাপে স্বীকাৰ কৰা মুছলমানসকলক সমালোচনাৰে থকা সৰকা কৰাৰ উপৰিও মাতৃভাষা অসমীয়া লিখা ধৰ্মীয় সংখ্যালঘু সকলক মিৰজাফৰ লগত তুলনা কৰে আব্দুল আজিজে । আজিজৰ এই স্পৰ্শকাতৰ আৰু অসমীয়া ভাষা বিদ্ধেষী মন্তব্যৰ পিছতেই সৃষ্টি হৈছে ব্যাপক প্ৰতিক্ৰিয়াৰ ।
বিধায়ক আব্দুল আজিজৰ এনে মন্তব্যৰ পিছতেই অসম জাতীয়তাবাদী যুৱ ছাত্ৰ পৰিষদে আজিজৰ অসমীয়া ভাষা বিদ্ধেষী মন্তব্যৰ বাবে মঙলবাৰে ৰূপহীহাট আৰক্ষী থানাত দাখিল কৰে এজাহাৰ । আনকি সংগঠনটোৱে এইগৰাকী বিতৰ্কিত নেতাক গ্ৰেপ্তাৰৰো দাবী জনায় । ইপিনে মঙলবাৰে প্ৰাক্তন বিধায়ক আব্দুল আজিজৰ বিৰুদ্ধে ৰূপহীহাটত সাব্যস্ত হয় উত্তাল প্ৰতিবাদ ।
ৰূপহী চাৰিআলিত আছুৱে প্ৰাক্তন বিধায়ক আজিজক গ্ৰেপ্তাৰ কৰাৰ দাবীত উলিয়াই এক বিশাল সমদল । ৰূপহীহাট চাৰিআলিত ছাত্ৰ সন্থাৰ সদস্যই দাহ কৰে বিতৰ্কিত বিজেপি নেতা আব্দুল আজিজৰ প্ৰতিকৃতি । অসমীয়া ভাষাক এলাগী কৰাৰ ষড়যন্ত্ৰত লিপ্ত হোৱা আব্দুল আজিজৰ বিৰুদ্ধে ব্যৱস্থা গ্ৰহণৰো দাবী উত্থাপন কৰে ছাত্ৰ সন্থাৰ স্থানীয় সদস্যসকলে ।
লগতে পঢ়ক : গণক সমাজ আৰু কোঁচ ৰাজবংশী দল সংগঠনৰ মাজত সৌহাদ্যপূৰ্ণ আলোচনা
কেৱল দল সংগঠনেই আব্দুল আজিজৰ এনে মন্তব্যৰ বিৰুদ্ধে জাঙুৰ খাই উঠে ধৰ্মীয় সংখ্যালঘু লোকসকলো । উল্লেখযোগ্য যে, বিগত অগপ আৰু কংগ্ৰেছ চৰকাৰৰ কাৰ্যকালত প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত আৰু প্ৰয়াত তৰুণ গগৈৰ কাৰ্যকালত তোষামোদত লিপ্ত হৈ আজিজে বহু সুবিধাই আদায় কৰাৰ অভিযোগ উত্থাপন হৈছে ।
পৰৱৰ্তী সময়ত বিজেপিয়ে চৰকাৰ গঠন কৰাৰ পিছত গেৰুৱা দলটোত যোগদান কৰে যদিও বিশেষ সা-সুবিধা আদায় কৰিব নোৱাৰিলে । তদুপৰি বিধায়ক হৈ থাকোতে 2010 চনত ৰাজ্য সভাৰ নিৰ্বাচনত অগপ প্ৰাৰ্থীক ভোট নিদি কংগ্ৰেছ প্ৰাৰ্থীক ভোট দিয়াৰ বাবে অগপৰ পৰা নিলম্বিত হ’বলগীয়া হৈছিল এইজন আব্দুল আজিজ ।
কিন্তু ইয়াৰ পিছতেই আজিজক কোনো এটা ৰাজনৈতিক দলেই বিশ্বাসত লোৱা নাই । শেহতীয়াকৈ আজিজৰ মুখত তৃণমূল কংগ্ৰেছৰ নাম উচ্চাৰিত হৈছে । তেনে স্থলত তৃণমূল কংগ্ৰেছত যোগদানৰ পথ সুগম কৰাৰ বাবে আজিজে অসমীয়া ভাষা বিদ্ধেষী মন্তব্য কৰা বুলি সমষ্টিত চৰ্চা চলিছে ।
লগতে পঢ়ক : জনতা ভৱনত মঙলবাৰৰ দুপৰীয়ালৈকে উৰি থাকিল ৰাষ্ট্ৰীয় পতাকা
