নগাঁৱৰ তুলসীমুখত নিশা দুই ফৈদৰ মাজত তুমূল সংঘৰ্ষ

নগাঁৱৰ তুলসীমুখত দুই ফৈদৰ মাজত হোৱা সংঘৰ্ষত প্ৰায় এঘাৰ জনকৈ লোক আহত হৈছে ৷ গুৰুতৰভাৱে আহত সকলক নগাঁও অসামৰিক চিকিৎসালয়লৈ প্ৰেৰণ কৰা হৈছে ৷

নগাঁও, 29 অক্টোবৰ : নগাঁৱৰ তুলসীমুখ দেউৰীগাঁৱত যোৱা নিশা দুই ফৈদৰ শতাধিক লোকৰ মাজত তুমূল সংঘৰ্ষৰ সৃষ্টি হয় ৷ এই সংঘৰ্ষৰ ফলত ডেকাৰ পৰা বৃদ্ধলৈকে সকলো আক্ৰমণৰ লক্ষ্য হৈ পৰে ৷ ঘটনাৰ বিৱৰণী অনুসৰি, দীৰ্ঘদিনৰ অন্তত নিজ গাঁৱলৈ দীপাৱলী উদযাপনৰ বাবে যোৱা পীযুষ ভূঞাই দীপাৱলীৰ নিশা 15 জনৰো অধিক যুৱকৰ সৈতে নিজ ঘৰত পাৰ্টীৰ আয়োজন কৰিছিল ৷ উচ্চস্তৰত গান-বাজনা লগাই পাৰ্টী কৰি থকাৰ সময়তে গাঁওবাসী আৰু পীযুষ ভূঞাৰ ফৈদৰ মাজত আৰম্ভ হয় সংঘৰ্ষ ৷

সংঘৰ্ষৰ ফলত আহত লোক

গাঁওবাসীয়ে কৰা অভিযোগ অনুসৰি,প্ৰথমে পীযুষ ভূঞাই গাঁৱৰ একাংশ লোকক আক্ৰমণ কৰাৰ লগতে নিজৰ স্কুটীত অগ্নিসংযোগ কৰিছিল ৷ কিন্তু,পীযুষ ভূঞাই জানিবলৈ দিয়া অনুসৰি গাওঁখনৰ একাংশ লোকেহে তেওঁৰ পৰিয়ালক শিলগুটিৰে আক্ৰমণ কৰাৰ লগতে স্কুটীত অগ্নিসংযোগ কৰিছিল ৷ এই সংঘৰ্ষৰ ফলত আহত হয় দুয়োটা ফৈদৰে প্ৰায় বিশ জনকৈ লোক ৷ আহত লোকসকলক নিশাই নগাঁও অসামৰিক চিকিৎসালয়ত ভৰ্তি কৰোৱা হয় ৷

উল্লেখ্য যে, প্ৰাক্তন কেন্দ্ৰীয় মন্ত্ৰী ৰাজেন গোহাঁইৰ নাৰী কেলেংকাৰীৰ সৈতে জড়িত হৈ পৰিছিল পীযুষ ভূঞা আৰু তেখেতৰ পত্নীৰ নাম ৷ কিন্তু পৰৱৰ্তী সময়ত গোচৰটো মিছা বুলি স্বীকাৰোক্তি দি গোচৰ প্ৰত্যাহাৰ কৰাত ৰাইজে মেল পাতি দুয়ো পতি-পত্নীক গাঁৱৰ পৰা উচ্ছেদ কৰাত তেওঁলোকে গুৱাহাটীত আশ্ৰয় লৈ আছিল ৷ মন কৰিবলগীয়া যে, পিচত অৱশ্যে আদালতে এই সম্পৰ্কত ৰাজেন গোহাঁইক ক্লীনচীট প্ৰদান কৰিছিল ৷

নগাঁৱৰ তুলসীমুখত দুই ফৈদৰ মাজত সংঘৰ্ষ