নগাঁও, 23 অক্টোবৰ: কলিয়াবৰত সদৌ অসম গৰীয়া-মৰিয়া যুৱ-ছাত্ৰ পৰিষদৰ অৱস্থান ধৰ্মঘট । উত্তৰ-পূৰ্বাঞ্চলৰ হজযাত্ৰীসকলৰ পৰা অত্যাধিক হাৰত বিমান ভাড়া লোৱাৰ প্ৰতিবাদত সংগঠনটোৱে বুধবাৰে কলিয়াবৰ মহকুমা কাৰ্যালয় প্ৰাংগণত অৱস্থান ধৰ্মঘট কাৰ্যসূচী ৰূপায়ণ কৰে ।
দেশৰ অন্য ৰাজ্যৰ হজ যাত্ৰীসকলৰ পৰা বিমান ভাড়াৰ নামত ৫০ হাজাৰ টকা লোৱাৰ বিপৰীতে অসম তথা উত্তৰ-পূৰ্বাঞ্চলৰ হজযাত্ৰীসকলৰ পৰা ১ লাখ ১১ হাজাৰ টকা জমা লোৱা হয় । এই ক্ষেত্ৰত কেন্দ্ৰীয় হজ কমিটিয়ে স্বজন-তোষণ কৰাৰ অভিযোগ উত্থাপন কৰিছে সংগঠনটোৱে ।
সংগঠনটোৱে এই ক্ষেত্ৰত এক উচিত তদন্ত কৰিবৰ বাবে মুখ্যমন্ত্ৰীৰ ওচৰত দাবী উথাপন কৰিছে । কলিয়াবৰ মহকুমাধিপতি কাৰ্য্যালয়ৰ সন্মুখত গৰীয়া-মৰীয়া যুৱ ছাত্ৰ পৰিষদে অৱস্থান ধর্মঘট পালন কৰি কেন্দ্ৰীয় হজ কমিটিৰ এনে স্বজন-তোষণৰ নীতি প্ৰত্যাহাৰ কৰিবলৈ দাবী জনাই মুখ্যমন্ত্ৰীক বিষয়টোত হস্তক্ষেপ কৰিবলৈ মহকুমাধিপতি বিতোপন নেওগৰ জৰিয়তে এখন স্মাৰক পত্ৰ প্ৰেৰণ কৰে ।
পৰিষদৰ প্ৰতিষ্ঠাপক উপদেষ্টা আলহাজ বদিৰত আলিয়ে কয় যে কেন্দ্ৰীয় হজ কমিটিৰ লগত লগ হৈ অসমৰ কেইজনমান লোকে পবিত্ৰ হজৰ নামত এক বৃহৎ ছিণ্ডিকেট ৰাজ চলাই আছে । হজযাত্ৰীসকলৰ পৰা বিমান ভাড়াৰ নামত অত্যাধিক হাৰত ধন আদায় লৈ আছে ।
