নগাঁও, ৫ অক্টোবৰ : ADRE অৰ্থাৎ ৰাজ্য চৰকাৰৰ তৃতীয় আৰু চতুৰ্থ বৰ্গৰ চাকৰিৰ বাবে ইতিমধ্যেই লিখিত পৰীক্ষা অনুষ্ঠিত হৈ যোৱাৰ সময়তেই চাকৰি দিয়াৰ নামত ওলাইছে ঠগ, প্ৰৱঞ্চক । চৰকাৰী চাকি দিয়াৰ নামত ব্যাপক হাৰত ধন সংগ্ৰহত নামি পৰিছে খোদ চৰকাৰী শিক্ষক ।
নগাঁৱৰ এগৰাকী চৰকাৰী শিক্ষকৰ বিৰুদ্ধে উত্থাপন হৈছে চাকৰিৰ নামত ধন সংগ্ৰহ কৰাৰ অভিযোগ । ৰাজ্যৰ মুখ্যমন্ত্ৰী ডঃ হিমন্ত বিশ্ব শৰ্মাই স্বচ্ছ নিযুক্তিৰ বাবে নানা পদক্ষেপ গ্ৰহণ কৰাৰ সময়তো একাংশ লোকক প্ৰৱঞ্চনা কৰি চাকৰিৰ নামত ধন সংগ্ৰহত নামি পৰিছে খোদ চৰকাৰী শিক্ষক ।
নগাঁৱৰ পূব ছিলনী মোক্তাব স্কুলৰ শিক্ষক লক্ষ্যজ্যোতি বৰা ওৰফে মুন বৰাই কেইবাগৰাকীও ব্যক্তিৰ পৰা চাকৰি দিয়াৰ নামত বৃহৎ পৰিমাণৰ ধন সংগ্ৰহ কৰাৰ অভিযোগ লাভ কৰিছে নগাঁও আৰক্ষীয়ে । এই পৰ্যন্ত চাৰিগৰাকীকৈ ব্যক্তিৰ পৰা অভিযোগ লাভ কৰি নগাঁও আৰক্ষীয়ে শুকুৰবাৰে প্ৰথমে আটক কৰি সোধা-পোছাৰ অন্তত এক গোচৰ ৰুজু কৰি প্ৰৱঞ্চনাৰ গোচৰত গ্ৰেপ্তাৰ কৰে শিক্ষক লক্ষ্যজ্যোতি বৰা ওৰফে মুন বৰাক ।
চৰকাৰী চাকৰি দিয়াৰ নামত ধন সংগ্ৰহ কৰাৰ অভিযোগত শিক্ষক মুন বৰাৰ বিৰুদ্ধে নগাঁও আৰক্ষীয়ে নগাঁও সদৰ আৰক্ষী থানাত 984/24 নম্বৰত ভাৰতীয় ন্যায় সংহিতাৰ 61(2)/118(4)/308(2) অধীনত গোচৰ ৰুজু কৰিছে । শুকুৰবাৰে সংবাদ মাধ্যমৰ সন্মুখত এই তথ্য সদৰী কৰে নগাঁও জিলা আৰক্ষী অধীক্ষক স্বপ্ননীল ডেকাই ।
উল্লেখ্য যে চৰকাৰী চাকৰি দিয়াৰ নামত ধন সংগ্ৰহ কৰাৰ অভিযোগ লাভ কৰাৰ পাচতেই প্ৰৱঞ্চনাৰ বিৰুদ্ধে তৎপৰ হৈ পৰে নগাঁও আৰক্ষী । অভিযোগ লাভ কৰাৰ পাচতেই অভিযান আৰম্ভ কৰি চাকৰিৰ নামত প্ৰৱঞ্চনা কৰা শিক্ষকগৰাকীক কৰায়ত্ত কৰিবলৈ সক্ষম হয় নগাঁও আৰক্ষী ।
আনহাতে, শুকুৰবাৰে সন্ধিয়া প্ৰৱঞ্চনাৰ গোচৰত গ্ৰেপ্তাৰ কৰা শিক্ষক মুন বৰাক অধিক তথ্যৰ বাবে নগাঁও আৰক্ষীয়ে মাৰাথন জেৰা অব্যাহত ৰখা বুলিও জানিব পৰা গৈছে ।
