মৰিয়নি, 3 জুন: আপুনি বাৰু মিঠাইজাতীয় সামগ্ৰী খাই ভাল পাইনে ? দোকানত বাৰেৰহনীয়া মিঠাই সজোৱা থাকিলে আপোনাৰো চাগে জিভাৰ পানী পৰে ! পিছে মিঠাইজাতীয় সামগ্ৰী ক্ৰয় কৰোতে আপুনি চাইনে বাৰু বিশুদ্ধতাৰ পৰিমাণ ? যদি নাচায়, তেন্তে সাৱধান ৷ আপোনাৰ সৰলতাৰ সুযোগ ল’ব পাৰে বিক্ৰেতাই ৷ কিয়নো মৰিয়নিত পোহৰলৈ আহিছে এক ভয়ংকৰ তথ্য ৷
মৰিয়নিত একাংশ বেকাৰী আৰু হোটেলে খাদ্য সুৰক্ষা বিভাগৰ (Food Safety and Standards Authority of India) নীতি নিৰ্দেশনা ভৰিৰে মোহাৰি গাহৰি গৰাল সদৃশ পৰিবেশত প্ৰস্তুত কৰিছে মানুহে খোৱা মিঠাইজাতীয় সামগ্ৰী ৷ এয়া মৰিয়নি নগৰৰ মাজমজিয়াত অৱস্থিত নামিদামী সৰকাৰ বেকাৰী আৰু কাৰিকৰ হোটেলৰ ভিতৰৰ পৰিৱেশ ৷
এনে মিঠাইজাতীয় সামগ্ৰী বিক্ৰীৰে জনস্বাস্থ্যৰ প্ৰতি ভাবুকি কঢ়িয়াই আনিছে সৰকাৰ বেকাৰী আৰু কাৰিকৰ হোটেল দুখনে (Sweets prepared in unhygienic place at Mariani) ৷ বিগত বহুদিন ধৰি ধাৰাবাহিকভাৱে এই দোকান দুখনে এনে কাৰ্য সংঘটিত কৰি আহিছে ৷ এই কথা জানিব পাৰি অস্বাস্থ্যকৰ পৰিবেশত বেকাৰী আৰু মিঠাই প্ৰস্তুত কৰি থকা সৰকাৰ বেকাৰী আৰু কাৰিকৰ হোটেলত সদৌ অসম ছাত্ৰ সন্থা (আছু) মৰিয়নি আঞ্চলিক সমিতিৰ দল উপস্থিত হৈ সকলো পৰিদৰ্শন কৰে ৷
লগতে অনতিপলমে অস্বাস্থ্যকৰ পৰিবেশত বেকাৰী আৰু মিঠাই প্ৰস্তুত কৰি বিক্ৰী কৰি জনস্বাস্থ্যৰ প্ৰতি ভাবুকি কঢ়িয়াই অনা এইসকল অসাধু ব্যৱসায়ীৰ বিৰুদ্ধে বিহিত ব্যৱস্থা গ্ৰহণ কৰিবলৈ প্ৰশাসনক অনুৰোধ জনাই আছু কৰ্মীসকলে ৷
লগতে পঢ়ক: মন্ত্ৰীসভাঃ দুই মিত্ৰদলৰ পৰা অন্তৰ্ভুক্ত হ'বনে কোনোবা ?
