টীয়ক,27 অক্টোবৰঃ দেশে স্বাধীনতা লাভ কৰা 70 টা দশক পাৰ হৈ যোৱাৰ পিছতো ৰাজ্যখনত এতিয়াও বহু অঞ্চলতে যাতায়াতৰ বাবে সুচল নহ'ল বাট-পথ ৷ কি কংগ্ৰেছ, কি বিজেপি কোনো এখন চৰকাৰেই এই সমূহ বাট পথ মেৰামতিৰ বাবে কোনো উপযুক্ত ব্যৱস্থা গ্ৰহণ নকৰিলে ৷ ফলত বছৰ-বছৰ ধৰি যাতায়াতৰ বাবে দুৰ্ভোগ ভূগিব লগীয়া হৈ ৰাইজে ৷
সমান্তৰালকৈ যোৰহাট জিলাৰ টীয়কটো বাট-পথৰ একেবাৰে জৰাজীৰ্ণ অৱস্থা ৷ সকলো পথৰ মাজতেই প্ৰকাণ্ড- প্ৰকাণ্ড গাঁঁত সৃষ্টি হোৱাৰ উপৰিও একাঠুকৈ বোকাৰ মাজেৰেই যাতায়াত কৰিবলগীয়া হৈছে ৰাইজে ৷
টীয়কত বিধ্বস্ত পথত অতিষ্ঠ ৰাইজ আনহাতে পৰিৱৰ্তনৰ ঢাক-ঢোল বজোৱা বিজেপি মিত্ৰজোঁট চৰকাৰ খনেও ইতিমধ্যে 4 বছৰ 6 মাহ অতিক্ৰম কৰিলে যদিও বাট-পথ মেৰামতিৰ বাবে কোনো উপযুক্ত ব্যৱস্থা নকৰাৰ ফলত যাতায়াতৰ বাবে যমৰ-যাতনা খাবলগীয়া হৈছে ৰাইজে ৷
ইফালে, টীয়ক নগৰৰ গাতে লাগি থকা চিৰাম মিচিং গাঁৱৰ মূল পথটোত একাঠু পৰ্যন্ত বোকা । ফলত গাড়ী চলাতো দূৰৰে কথা খোজ কাঢ়িয়ো যাব নোৱাৰা পৰিৱেশৰ সৃষ্টি হৈছে ৷ পথটো জৰাজীৰ্ণ অৱস্থা হোৱাৰ বাবে ছাত্ৰ-ছাত্ৰী সকলে বিদ্যালয়লৈ গৈ শিক্ষা গ্ৰহণৰ পৰাও বঞ্চিত হ'বলগীয়া হৈছে বুলি গুৰুতৰ অভিযোগ কৰিছে ৰাইজে ৷
আনহাতে, মূল পথটো মেৰামতি কৰি দিবলৈ স্থানীয় জনপ্ৰতিনিধি গৰাকীৰ লগতে বিভাগীয় কৰ্তৃপক্ষক বাৰম্বাৰ অনুৰোধ কৰি আহিছে ৰাইজে ৷ কিন্তু পথটো মেৰামতিৰ বাবে স্থানীয় জনপ্ৰতিনিধি আৰু বিভাগীয় কৰ্তৃপক্ষই কোনো ব্যৱস্থা গ্ৰহণ নকৰাত অতিস্থ স্থানীয় ৰাইজৰ লগতে বিভিন্ন দল সংগঠন হৈ পৰিছে অধিক ক্ষুব্ধ ৷ সেয়ে অনতি পলমে পথটো যাতায়াতৰ বাবে সুচল কৰি দিবলৈ চৰকাৰক আহ্বান জনাইছে টীয়কবাসী ৰাইজে।
লগতে পঢ়ক- দক্ষিণ কামৰূপত মটৰচাইকেল আৰু মেজিকৰ সংঘৰ্ষ
