কি খাব আপুনি ? ঠেকেৰা কেণ্ডি নে আমৰ কেণ্ডি নে মৌজুল কেণ্ডি..

আপুনি কেণ্ডি খাইনে ? যদি খাই, কেনেধৰণৰ কেণ্ডি খাই পাইছে ? কেতিয়াবা খাইছেনে ঠেকেৰা কেণ্ডি ? হয়, ঠেকেৰাৰ কেণ্ডিও এতিয়া উপলব্ধ হৈছে বজাৰত ৷ এতিয়া অসমীয়া সোৱাদত থলুৱাভাৱে প্ৰস্তুত কৰি উলিওৱা হৈছে নানা ধৰণৰ কেণ্ডি ৷ যোৰহাটৰ লীলাচৰণ দত্ত নামৰ লোকজনে প্ৰস্তুত কৰি উলিয়াইছে এই থলুৱা সোৱাদযুক্ত কেণ্ডিসমূহ ৷

যোৰহাট, 6 মে’: থলুৱা সোৱাদেৰে অন্য কেণ্ডিৰ লগত ফেৰ মাৰিবলৈ বজাৰলৈ আহি আছে নানা ৰকমৰ কেণ্ডি ৷ যোৰহাট মৌজাৰ অন্তৰ্গত পঞ্চৱতীৰ লীলাচৰণ দত্তৰ ব্যতিক্ৰমী প্ৰচেষ্টাৰে প্ৰস্তুত কৰা হৈছে থলুৱা কেণ্ডিসমূহ৷ সচৰাচৰ পোৱা থলুৱা সামগ্ৰীসমূহেৰে লীলাচৰণ দত্তই প্ৰস্তুত কৰি উলিয়াইছে ঠেকেৰা কেণ্ডি, মৌজুল কেণ্ডি, আমৰ কেণ্ডি, কমলা অথবা কফিৰ সোৱাদযুক্ত কেণ্ডি ৷

উল্লেখ্য যে, লীলাচৰণ দত্তই নিজৰ ঘৰতে প্ৰস্তুত কৰে এইসমূহ কেণ্ডি ৷ ১৯৯৭ চনতে স্থাপন কৰা চি কে নামৰ ক্ষুদ্ৰ উদ্যোগটোৱে বৰ্তমান কেণ্ডিৰ বজাৰখনত অন্য বহুজাতিক কোম্পানীৰ লগতো ফেৰ মাৰিবলৈ সক্ষম হৈছে ৷ প্ৰায় ৩০০ বাকছ ইটালীৰ "এপিছ মেলিফেৰা" ঘৰচীয়া মৌৰ সহায়ত এতিয়া স্থানীয় ভাৱে উৎপাদন কৰি আছে বিভিন্ন সোৱাদ যুক্ত কেণ্ডি । ইয়াৰোপৰি, প্ৰায় 22 টা বছৰ গৰকা ক্ষুদ্ৰ উদ্যোগটোত সম্প্ৰতি, প্ৰায় 42 গৰাকী যুৱক কৰ্মৰত ৷ সূদূৰ নেডাৰলেণ্ডৰ ICCO সন্থাই স্বত্বাধিকাৰী লীলাচৰণক ঋণ প্ৰদান কৰি আহিছে ।