গুৱাহাটী, 26 অক্টোবৰ : দীঘলীপুখুৰীৰ পাৰত ৰাজ্যপাল জগদীশ মুখীয়ে প্ৰজ্বলিত কৰিলে সৰ্ববৃহৎ মাটি চাকি ৷ 'এক ডিয়া প্ৰকৃতিকে নাম' শীৰ্ষক শ্ল'গানেৰে পৰিৱেশ সুৰক্ষিত কৰাৰ উদ্দেশ্যে প্ৰজ্বলিত কৰা হ'ল সৰ্ববৃহৎ চাকি গছি । দেৱালী উপলক্ষে জনসাধাৰণক সজাগ কৰাৰ উদ্দেশ্যে নিৰ্মাণ কৰা হৈছিল সৰ্ববৃহৎ মাটিৰ চাকি গছি । মেক্স চিমেণ্টৰ সহযোগত উৎপল কান্তৰ প্ৰচেষ্টাত মাহজোৰা প্ৰচেষ্টাৰে 10 জন লোকে নিৰ্মাণ কৰি উলিয়ালে এই চাকি গছি ৷
দীঘলীপুখুৰী পাৰত সকলো লোকৰ উপস্থিতত চাকি গছি প্ৰজ্বলন কৰে অসমৰ ৰাজ্যপাল জগদীশ মুখীয়ে ৷ পৰিৱেশ সুৰক্ষিত কৰি ৰাখিবৰ বাবে গ্ৰহণ কৰা এই পদক্ষেপক ৰাজ্যপাল গৰাকীয়ে ভূয়সী প্ৰশংসা কৰে ৷ লগতে ৰাজ্যপালগৰাকীয়ে প্লাষ্টিক মুক্ত এখন পৃথিৱী গঢ়াৰ লগতে এই দেৱালীত সেউজ দেৱালী উদযাপনৰ বাবে সকলোকে অনুৰোধ কৰে।
উল্লেখ্য যে,ইতিমধ্যে গ্ৰীনিজ বুক অৱ ৰেকৰ্ড আৰু লিমকা বুক অৱ ৰেকৰ্ডত চাকি গছিৰ নাম অন্তৰ্ভুক্তিৰ বাবে কৰা হৈছে সকলো যাৱতীয় নথি পত্ৰৰ কাম। ৰেকৰ্ডত নাম অন্তৰ্ভুক্তি হ'লেই অসমলৈ আন এক গৌৰৱ কঢ়িয়াই আনিব চাকি গছিয়ে ৷
