পুৱা 9 বজাৰ শীৰ্ষ দহটা বাতৰি

পুৱা 9 বজাৰ শীৰ্ষ দহটা বাতৰি

বিলাসীপাৰাৰ কাজাইকাটা ষষ্ঠম খণ্ড গাঁৱত মঙলবাৰে বিয়লি সংঘটিত হয় ভংয়কৰ অগ্নিকাণ্ড ৷ অগ্নিকাণ্ডটোত গুৰুতৰভাৱে আহত হয় 6 জন লোক ৷ বৈদ্যুতিক শ্বৰ্ট চাৰ্কিটৰ ফলত অগ্নিকাণ্ডৰ সূত্ৰপাত হয় ৷

পশ্চিম গুৱাহাটীৰ ধাৰাপুৰত উত্তপ্ত পৰিস্থিতি ৷ নিৰ্বাচনী বিষয়াৰ বাহনত EVM থকাক লৈ সৃষ্টি হয় উত্তপ্ত পৰিস্থিতি ৷ বাহনখন প্ৰিজাইডিং অফিচাৰৰ বাহন আছিল ৷ জানিব পৰা মতে, স্থানীয় একাংশ লোকে বাহনখন ঘেৰাও কৰে ক্ষোভ প্ৰকাশ কৰে আৰু বাহনখন একাংশ উত্তেজিত লোকে ভাঙি লণ্ড-ভণ্ড কৰে ৷

সুদীৰ্ঘ ২৮ বছৰ পাচত গণতান্ত্ৰিক অধিকাৰ সাব্যস্ত কৰে আচমা খাতুন নামৰ এগৰাকী মহিলাই । জনীয়া বিধানসভা সমষ্টিৰ অন্তৰ্গত সালেকুৰা এল পি স্কুল ভোট গ্ৰহণ কেন্দ্ৰত ভোটাধিকাৰ সাব্যস্ত কৰে আচমা খাতুনে ।

ভোটগ্ৰহণৰ সমাপ্তিৰ পাচতে বৰপেটা কংগ্ৰেছৰ ৯ জন কৰ্মীক নিলম্বন ৷ দল বিৰোধী কাৰ্য আৰু দলীয় অনুশাসন ভংগ কৰাৰ অপৰাধত ৯ নেতাক বৰ্খাস্ত কৰা হৈছে ৷

ধুবুৰীৰ গৌৰীপুৰত ই ভি এমক লৈ উত্তপ্ত পৰিস্থিতি ৷ নিৰাপত্তাৰক্ষী নোহোৱাকৈ ইভিএম লৈ গৈ থকা অৱস্থাত ৰাইজৰ ৰোষত পৰিল ছেক্টৰ বিষয়া ৷

জনীয়াৰ ১১৮ নং খাতাৰটাৰী ভোটকেন্দ্ৰত ভোটদানৰ পৰা বঞ্চিত শতাধিক ভোটাৰ । ইভিএমৰ বিসংগতি আৰু প্ৰিজাইডিং বিষয়াৰ হেমাহিৰ বাবে ভোটাধিকাৰৰ পৰা শতাধিক ভোটাৰ ৰাইজ বঞ্চিত হোৱাৰ অভিযোগ । ঘটনাক কেন্দ্ৰ কৰি উত্তপ্ত পৰিস্থিতি ৷

পূৱ বিলাসীপাৰা সমষ্টিৰ চাপৰত নিশালৈকে চলিল ভোটদান প্ৰক্ৰিয়া ৷ দুবাৰকৈ ইভিএম বিকল হোৱা বাবে বিলম্ব হ’ল ভোটদান প্ৰক্ৰিয়া ৷

ৰাজ্যত অন্তিম পৰ্যায়ৰ নিৰ্বাচনৰ আগনিশা অৰ্থাৎ সোমবাৰে নিশা ছয়গাঁৱত সংঘটিত হয় এক হিংসাত্মক ঘটনা ৷ সোমবাৰে সন্ধিয়া ছয়গাঁও সমষ্টিৰ কংগ্ৰেছ প্ৰাৰ্থী ৰেকিবুদ্দিন আহমেদৰ পত্নীক আক্ৰমণ কৰে দুৰ্বৃত্তই ৷ ৰেকিবুদ্দিনৰ পত্নী নুৰী খানক লক্ষ্য কৰি ৰড, লাঠীৰে আক্ৰমণ কৰে দুৰ্বৃত্তই ।

শোকাকুল পৰিৱেশৰ মাজতে বজালীৰ ভাৰেগাঁৱত অন্ত্যেষ্টিক্ৰিয়া সম্পন্ন হ'ল শ্বহীদ দিলীপ কুমাৰ দাসৰ ৷ পঞ্চভূতত বিলীন হ'ল জোৱান গৰাকী ৷

ৰাজ্যত ভয়াৱহ ৰূপত বৃদ্ধি পাইছে মহামাৰী কৰ’ণাৰ গণ সংক্ৰমণ ৷ মঙলবাৰে যোৰহাটত 11 গৰাকী ব্যক্তিৰ দেহত ধৰা পৰিছে কৰ’ণা মহামাৰীৰ অৱস্থিতি ৷