গুৱাহাটী, 1 জুনঃ ৰাজ্যৰ বান পৰিস্থিতি ক্ৰমাৎ অৱনতি ঘটিছে ৷ এনে অৱস্থাত শুকুৰবাৰে অসম ৰাজ্যিক দুৰ্যোগ ব্যৱস্থাপনা বিভাগে বান পৰিস্থিতিৰ সৈতে মোকাবিলা কৰিবলৈ শিক্ষকসকলক নিয়োগ কৰাৰ বাবে এক নিৰ্দেশনা জাৰী কৰে ৷ অসম ৰাজ্যিক দুৰ্যোগ ব্যৱস্থাপনা বিভাগে বিদ্যালয়, মহাবিদ্যালয়ৰ শিক্ষকসকলক বান সাহাৰ্য আৰু উদ্ধাৰ অভিযানত নিয়োগ হ'বৰ বাবে জাৰি কৰে এই নিৰ্দেশনা । ইয়াকে লৈ অসন্তুষ্টি ব্যক্ত কৰিছে ৰাজ্যৰ একাংশ শিক্ষকে ।
উল্লেখযোগ্য যে কৰ'ণা মহামাৰীৰ ফলত দীঘলীয়া পৰ্যায়ৰ লকডাউনত দেশৰ লগতে ৰাজ্যৰ সকলো শিক্ষানুষ্ঠান মাৰ্চ মাহৰ শেষৰ পৰা প্ৰায় দুমাহ ধৰি সম্পূৰ্ণ ৰূপে বন্ধ হৈ আছে । যাৰ ফলত শিক্ষাৰ্থীসকলক অনলাইন যোগে পাঠদান কৰা হৈছে ।
কিন্তু চৰকাৰে হঠাৎ জাৰী কৰা এই নিৰ্দেশনাই বিপাঙত পেলাইছে শিক্ষকসকলক । পঞ্চম পৰ্যায়ৰ লকডাউনৰ পাছত পৰ্যায়ক্ৰমে বিদ্যালয়, মহাবিদ্যালয়সমূহ খোলাৰ কথাও ঘোষণা কৰিছে চৰকাৰে । এনে অৱস্থাত বান সাহাৰ্য আৰু উদ্ধাৰ অভিযানত শিক্ষকসকলক নিয়োজিত কৰিবৰ বাবে অসম ৰাজ্যিক দুৰ্যোগ ব্যৱস্থাপনা বিভাগে জিলা প্ৰশাসনসমূহলৈ জাৰী কৰা এই নিৰ্দেশনাক লৈ আপত্তি দৰ্শাইছে শিক্ষকসকলে ৷
লগতে পঢ়কঃ ভয়াৱহ বানৰ কৱলত ৰাজ্যঃ 7গৰাকীৰ মৃত্যু, লক্ষাধিক ক্ষতিগ্ৰস্থ
