গুৱাহাটী, 26 অক্টোবৰঃ অপৰাধীৰ ৰম্যভূমিলৈ পৰিণত হোৱা গুৱাহাটী মহানগৰীত গা-কৰি উঠিছে চোৰাং ড্ৰাগছৰ এখন বৃহৎ বজাৰ ৷ নাগালেণ্ডৰ পৰা নিয়ন্ত্ৰিত হোৱা এই ড্ৰাগছৰ চোৰাং বজাৰখনত শেহতীয়াকৈ জড়িত হৈ পৰিছে একাংশ কিশোৰ-কিশোৰী ৷
লগতে পঢ়কঃ নৱগ্ৰহত ৰাজ্যিক মৰ্যাদাৰে সম্পন্ন খগেন শৰ্মাৰ শেষকৃত্য
গুৱাহাটীৰ পৰা দেশৰ বিভিন্ন প্ৰান্তলৈ সৰবৰাহ হৈ আহিছে ড্ৰাগছ,আৰু ইয়াৰ বাবে গুৱাহাটী ৰেলৱে ষ্টেচনক যোগসূত্ৰ কৰি লৈছে ড্ৰাগছ ব্যৱসায়ীসকলে ৷ বিগত বৰ্ষৰ লগতে চলিত বৰ্ষটো গুৱাহাটী ৰেলৱে ষ্টেচনৰ পৰা জব্দ হৈছে কোটি টকা মূল্যৰ নিষিদ্ধ ড্ৰাগছ ৷ আটাইতকৈ উদ্বেগজনক কথাটো হৈছে আৰক্ষীৰ চকুৰ পৰা হাত সাৰিবলৈ ড্ৰাগছ সৰবৰাহৰ বাবে ইয়াৰ অন্তৰালত থকা চক্ৰটোৱে জড়িত কৰাইছে একাংশ কিশোৰ-কিশোৰীক ৷ শনিবাৰে পুনৰ গুৱাহাটী ৰেলৱে আৰক্ষীয়ে ষ্টেচনৰ পৰাই জব্দ কৰে 30 লক্ষাধিক মূল্যৰ নিষিদ্ধ ড্ৰাগছ ৷ ৰেল আৰক্ষীৰ নিয়মীয়া তালাচীৰ সময়তে নামনিমুৱা কামৰূপ এক্সপ্ৰেছত এগৰাকী কিশোৰীৰ পৰা 12 হাজাৰ নিচাযুক্ত টেবলেট জব্দ কৰিবলৈ সক্ষম হয় ৷ ডিমাপুৰৰ পৰা পশ্চিমবংগৰ মালদালৈ নিবলৈ এইদৰে কিশোৰীৰ হতুৱাই চক্ৰটোৱে প্ৰেৰণ কৰিছিল ড্ৰাগছখিনি ৷
লগতে পঢ়কঃ চৰকাৰী প্ৰহসনত পৰিণত বৰপেটাৰ আতচবাজী গাঁও
অপৰাধীৰ ঘাটিলৈ পৰিণত হোৱা গুৱাহাটী মহানগৰীত শেহতীয়াকৈ গা-কৰি উঠিছে নিষিদ্ধ ড্ৰাগছৰ এটা শক্তিশালী চক্ৰই ৷ নিষিদ্ধ ড্ৰাগছৰ সৰবৰাহৰ সৈতে চক্ৰটোৱে জড়িত কৰাইছে কিশোৰীক ৷ শনিবাৰে গুৱাহাটী ৰেলৱে ষ্টেচনত জব্দ হোৱা ড্ৰাগছখিনিয়ে এই কথা পুনৰবাৰ প্ৰমাণ কৰি তুলিছে ৷ অৱশ্যে ৰেলৱে আৰক্ষী নিশিদ্ৰ পহৰা তথা তালাচীৰ বাবে বহুসময়ত এইসমূহ চক্ৰ উৎখাত হৈ আহিছে যদিও বহু পৰিমাণৰ ড্ৰাগছ ধৰা নপৰাকৈয়ে দেশৰ বিভিন্ন প্ৰান্তলৈ সৰবৰাহ হৈ আছে ৷
