গুৱাহাটী, 29 জুন : গুৱাহাটী এৰি আজি অৰ্থাৎ বুধবাৰে ওভতিব মহাৰাষ্ট্ৰৰ বিসম্বাদী বিধায়কসকল(Maharashtra Rebel MLAs) । গুৱাহাটীৰ বৰঝাৰ বিমান বন্দৰৰ পৰা বিশেষ বিমানেৰে গোৱালৈ যাব হোটেল ৰেডিশ্বন ব্লুত বাহৰ পাতি থকা 48 জন বিধায়ক । বিসম্বাদী বিধায়ককেইজন গোৱালৈ ওভতাৰ পৰিপ্ৰেক্ষিতত বৰঝাৰ বিমানবন্দৰত ইতিমধ্যে কটকটীয়া নিৰাপত্তা বেষ্টনি গঢ়ি তোলা হৈছে ।
আজি দিনৰ ৩.৩০ বজাত আটাইকেইজন উৰা মাৰিব গোৱালৈ । গোৱাৰ হোটেল তাজত বুকিং কৰা হৈছে ৭১ টা কোঠা । ইফালে বৰঝাৰ বিমানবন্দৰত মোতায়েন কৰা হৈছে বিশাল আৰক্ষী বাহিনী, বান্ধি দিয়া হৈছে বেৰিকেড । পৰিস্থিতিৰ বুজ লৈ আছে আৰক্ষীৰ উচ্চ পদস্থ বিষয়াই । দিনৰ 12 বজাৰ পিছত হোটেল ৰেডিশ্বন ব্লুৰ ত্যাগ কৰিব বিধায়কসকলে ।
উল্লেখ্য যে, একনাথ সিন্দেসহ চাৰিজন বিসম্বাদী বিধায়কে বুধবাৰে পুৱা ৭.৪৫ বজাত হোটেল ৰেডিশ্বন ব্লুৰ পৰা কামাখ্যালৈ ওলাই গৈছিল । তেওঁলোক কামাখ্যাৰ পৰা পুনৰ ৰেডিশ্বন ব্লুলৈ উভতি আহে । জানিব পৰা মতে, দুটা ভাগত বিভক্ত হৈ বিসম্বাদী বিধায়কৰ দলটো যাত্ৰা কৰিব । বিগত 20 জুনৰ পৰা হোটেলখনত বাহৰ পাতি আছিল মহাৰাষ্ট্ৰৰ বিসম্বাদী বিধায়কসকলে । শিৱসেনাৰ 39 আৰু শিৱসেনা সমৰ্থিত 9 জন নিৰ্দলীয় বিধায়ক আছে দলটোত । বিধায়কসকল গোৱাৰ পৰা বৃহস্পতিবাৰে মুম্বাইলৈ যাব ।
লগতে পঢ়ক : একনাথ সিন্দেসহ চাৰিজন বিধায়ক কামাখ্যালৈ
