গুৱাহাটী, ১৮ ডিচেম্বৰ : সোমবাৰৰ পৰা অনুষ্ঠিত হ’বলগীয়া অসম বিধানসভাৰ শীতকালীন অধিবেশন(Assam Legislative Assembly Session, 2021)ত চৰকাৰে গো-সুৰক্ষা সংশোধনী বিধেয়ক(Assam Cattle Preservation Act, 2021)খন উত্থাপন কৰাৰ সম্ভাৱনা আছে । বিধানসভাৰ যোৱাটো অধিবেশনত বিৰোধীৰ তুমুল প্ৰতিবাদৰ পিছতো সদনত গৃহিত হৈছিল বহু চৰ্চিত গো-সুৰক্ষা বিধেয়ক । কিন্তু এতিয়া সেই বিধেয়কত কেতবোৰ সংশোধনী আনিব খুজিছে চৰকাৰে ।
বিৰোধী দলপতি দেবব্ৰত শইকীয়া(Opposition leader Debabrata Saikia)ই শনিবাৰে এই প্ৰসংগত প্ৰতিক্ৰিয়া ব্যক্ত কৰি কয় যে, যোৱা বিধানসভা অধিবেশনত শাসক পক্ষই গাৰ জোৰেৰে বিধেয়কখন সদনত গৃহিত কৰিছিল । সেই সময়ত কংগ্ৰেছ দলৰ ফালৰ পৰা সদনত বাৰম্বাৰ চৰকাৰক আহ্বান জনোৱা হৈছিল যে বিধেয়কখনত কেতবোৰ সংশোধনী অনাটো দৰকাৰ । আনকি বিধেয়কখন গৃহিত কৰাৰ পূৰ্বে বাচনি কমিটি (Select Committee) লৈ পঠিয়াবলৈও কংগ্ৰেছে সদনত আহ্বান জনাইছিল ।
কিন্তু সেই সময়ত চৰকাৰে কংগ্ৰেছৰ কথা নুশুনিলে আৰু বিধেয়কখন বিধানসভাত গৃহিত কৰা হ'ল ৷ তেতিয়াই বিধেয়কখনৰ সকলো দিশ চালিজাৰি চাই ঠিকঠাক কৰি লোৱা হ'লে এতিয়া পুনৰ সংশোধনী আনি বিধানসভাৰ মূল্যবান সময় নষ্ট কৰিবলগীয়া নহ'লহেতেন বুলিও মন্তব্য কৰে বিৰোধী দলপতিগৰাকীয়ে ।
লগতে পঢ়ক : তীব্ৰ বাদানুবাদৰ অন্তত বিধানসভাত গৃহীত গো-সুৰক্ষা বিধেয়ক
