গুৱাহাটী,7 জুলাইঃ গোলাঘাট সমষ্টিৰ বিধায়িকা অজন্তা নেওগ বিজেপিত যোগদান কৰিব বুলি প্ৰকাশ পোৱা বাতৰিটোৰ বিৰুদ্ধে সৰৱ হৈ পৰে অজন্তা নেওগ ৷ নিজৰ স্থিতি স্পষ্ট কৰি সাংবাদ মাধ্যমলৈ প্ৰতিলিপি প্ৰেৰণ কৰে বিধায়িকা গৰাকীয়ে ৷
কৰ'ণা মহামাৰীৰ সমান্তৰালকৈ ৰাজ্যত আৰম্ভ হৈছে আগন্তুক নিৰ্বাচনৰ কুচ-কাৱাজ । নিৰ্বাচনৰ প্ৰতি লক্ষ্য ৰাখি বহু ৰাজনৈতিক নেতা-বিধায়ক ইটো দলৰ পৰা সিটো ৰাজনৈতিক দললৈ যোৱাৰ মন মেলিছে । শেহতীয়াকৈ গোলাঘাট সমষ্টিৰ বিধায়িকা অজন্তা নেওগে বিজেপিত যোগদান কৰিব বুলি বহু চৰ্চা লাভ কৰিছিল ।
কিন্তু এই সন্দৰ্ভত ইতিমধ্যে মুখ খুলিছে জ্যেষ্ঠ কংগ্ৰেছ নেত্ৰী তথা প্ৰাক্তন মন্ত্ৰী অজন্তা নেওগে । তেওঁৰ বিজেপি গমনৰ বাতৰি সম্পূৰ্ণ ভিত্তিহীন বুলি কয় প্ৰাক্তন মন্ত্ৰীগৰাকীয়ে । কংগ্ৰেছ দল এৰি মই কেতিয়াও আন দলত যোগদান নকৰো বুলি উল্লেখ কৰে ৷ লগতে এয়া তেওঁৰ বিৰুদ্ধে কোনোৱে ষড়যন্ত্ৰ কৰা বুলি সাংবাদিকৰ আগত মন্তব্য কৰে । লগতে একাংশ বৈদ্যুতিন মাধ্যমত প্ৰকাশ পোৱা এই বাতৰিটো ভিত্তিহীন ৷ লগতে দলীয় সমৰ্থক তথা কৰ্মী সকলক এনেধৰণৰ অপ প্ৰচাৰক বিশ্বাসত নল'বলৈ আহ্বান জনাইছে বিধায়িকা গৰাকীয়ে ৷
