গুৱাহাটী, 17 জানুৱাৰী : মুখ্যমন্ত্ৰী ড॰ হিমন্ত বিশ্ব শৰ্মাই সোমবাৰে গুৱাহাটী মহানগৰীৰ জয়ানগৰত সদৌ টাই আহোম ছাত্ৰ সন্থা (All Tai Ahom students union) ৰ কেন্দ্ৰীয় কাৰ্যালয়ৰ নৱ নিৰ্মিত গৃহ তথা টাই সাংস্কৃতিক উন্নয়ন আৰু গৱেষণা কেন্দ্ৰ আনুষ্ঠানিকভাবে উদ্বোধন কৰে ৷ মুখ্যমন্ত্ৰীয়ে টাই আহোম পৰম্পৰা অনুসৰি ‘বানফী’ পূজা আগবঢ়ায় ৷
এই উপলক্ষে আয়োজিত সভাত ভাষণ প্ৰদান কৰি মুখ্যমন্ত্ৰীয়ে কয় যে, ৰাজ্যখনৰ এক অগ্ৰণী ছাত্ৰ সংগঠন হিচাপে সদৌ টাই আহোম ছাত্ৰ সন্থাই ৰাজ্যখনৰ সামাজিক-সাংস্কৃতিক উত্তৰণৰ দিশত গুৰুত্বপূৰ্ণ অৰিহণা যোগাই আহিছে ৷ স্বৰ্গদেউ চাওলুং চ্যুকাফাৰ দিনৰে পৰা টাই আহোম সম্প্ৰদায়ে অসমীয়া জাতিৰ শক্তিশালীকৰণৰ দিশত উল্লেখযোগ্য অৱদান যোগাই আহিছে ৷ এইক্ষেত্ৰত আটাছুৱে এই পৰম্পৰাক আগুৱাই নিয়াৰ দিশত অৰ্থৱহ ভূমিকা পালন কৰি আহিছে ৷
টাই আহোম সম্প্ৰদায়ৰ সৰ্বাংগীণ উন্নয়ন (Development of Tai Ahom Community) ৰ বাবে ৰাজ্য চৰকাৰ দায়বদ্ধ বুলি উল্লেখ কৰি মুখ্যমন্ত্ৰীয়ে কয় যে, এই সম্প্ৰদায়ৰ সংস্কৃতি আৰু চহকী ঐতিহ্য সংৰক্ষণৰ বাবে ৰাজ্য চৰকাৰে বিভিন্ন প্ৰকল্প গ্ৰহণ কৰিছে ৷ তেওঁ লগতে কয় যে, ধেমাজি জিলাৰ হাবুঙত চলি থকা প্ৰকল্পটো আগন্তুক মে-ডাম-মে-ফীৰ সময়ত জনসাধাৰণৰ বাবে উৎসৰ্গিত কৰা হ’ব ৷ আন এক প্ৰকল্প নাহৰকটীয়াৰ টিপামত গ্ৰহণ কৰা হ’ব বুলিও মুখ্যমন্ত্ৰীয়ে সদৰী কৰে ৷
মুখ্যমন্ত্ৰীয়ে লগতে আশ্বাস প্ৰদান কৰি কয় যে, আটাছুৰ নৱ নিৰ্মিত কাৰ্যালয়টোৰ অতিৰিক্ত কামৰ বাবে ৰাজ্য চৰকাৰে পুঁজি যোগান ধৰিব । অনুষ্ঠানত শিক্ষামন্ত্ৰী ডাঃ ৰণোজ পেগু (Education minister Ranoj Pegu), সাংস্কৃতিক পৰিক্ৰমা বিভাগৰ মন্ত্ৰী বিমল বৰা, আটাছুৰ কেন্দ্ৰীয় সমিতিৰ সভাপতি লিতুল বুঢ়াগোঁহাইকে ধৰি ছাত্ৰ সংগঠনটোৰ প্ৰাক্তন তথা বৰ্তমানৰ বিষয়-ববীয়াসকল উপস্থিত থাকে ৷
লগতে পঢ়ক : মুখ্যমন্ত্ৰী আৰু বিধায়ক অমিয় ভূঞাৰ বিতৰ্ক সন্দৰ্ভত DGP ক অভিযোগ দাখিল ভূপেন বৰাৰ
