গুৱাহাটী, 1 এপ্ৰিল : সকলো জল্পনা-কল্পনা আৰু বাক-বিতণ্ডাৰ অন্তত বৃহস্পতিবাৰে নিশা আনুষ্ঠানিকভাৱে ঘোষণা কৰা হয় ৰাজ্যসভাৰ নিৰ্বাচনৰ ফলাফল (Assam Rajya Sabha Election Results 2022) । ৰাজ্যসভাৰ দুয়োখন আসনতে শাসকীয় পক্ষৰ প্ৰাৰ্থী পবিত্ৰ মাৰ্ঘেৰিটা আৰু বিজেপি মিত্ৰজোঁটৰ প্ৰাৰ্থী ৰণগৌৰা নাৰ্জাৰীয়ে জয়লাভ কৰে ৷ পবিত্ৰ মাৰ্ঘেৰিটাই 46 টা আৰু ৰণগৌৰা নাৰ্জাৰীয়ে 44 টা ভোট লাভ কৰিছে । ইপিনে বিৰোধীৰ উমৈহতীয়া প্ৰাৰ্থী ৰিপুন বৰাই পৰাজয় বৰণ কৰিছে । ৰিপুন বৰাক জয়ীৰ বাবে 43 টা ভোট অৰ্থাৎ 43 বিধায়কৰ প্ৰয়োজন আছিল । কিন্তু ৰিপুন বৰাই 35 টাহে ভোট লাভ কৰিবলৈ সক্ষম হয় । নাকচ হৈছে এটা ভোট ।
উল্লেখ্য যে, কংগ্ৰেছৰ নিলম্বিত বিধায়ক শশীকান্ত দাসে বিজেপিৰ পক্ষত ভোট দিয়াৰ লগতে কংগ্ৰেছৰ বিধায়ক ছিদ্দিক আহমেদে কংগ্ৰেছৰ প্ৰাৰ্থীক ভোটদান নকৰি ইচ্ছাকৃতভাৱে ভুলকৈ ভোটদান কৰিছে । ইতিমধ্যে দল বিৰোধী কামত লিপ্ত হোৱাৰ অভিযোগত ছিদ্দিক আহমেদক কংগ্ৰেছৰ পৰা নিলম্বন কৰা হৈছে । ইপিনে নিৰ্বাচনত জয়লাভ কৰি বিজেপি মিত্ৰজোঁটৰ প্ৰাৰ্থী পবিত্ৰ মাৰ্ঘেৰিটাই সকলো বি জে পি আৰু মিত্ৰজোঁটৰ অংশীদাৰ দলৰ বিধায়ক, মুখ্যমন্ত্ৰী আৰু ৰাজ্যিক বি জে পিৰ সভাপতি ভৱেশ কলিতাক ধন্যবাদ জনায় ।
তেওঁ লগতে কয় যে, মোক ভোট দিয়াৰ বাবে কংগ্ৰেছৰ বিধায়ক, ৰাইজৰ দলৰ বিধায়ক অখিল গগৈক আৰু চি পি আই এমৰ বিধায়ক মনোৰঞ্জন তালুকদাৰক ধন্যবাদ জনাইছো । ইপিনে নিৰ্বাচনত পৰাজয় বৰণ কৰা বিৰোধী দলৰ বিৰোধী উমৈহতীয়া প্ৰাৰ্থী ৰিপুন বৰাই কয় যে, গণতন্ত্ৰৰ প্ৰতি সাংঘাতিক প্ৰত্যাহ্বান আহিছে । কংগ্ৰেছে ইয়াৰ বিৰুদ্ধে যুঁজি যাব । ইপিনে নিৰ্বাচনত পৰাজয় হোৱাৰ বাবে বিৰোধী দলৰ দলপতি দেৱব্ৰত শইকীয়াই এ আই ইউ ডি এফকে দোষাৰোপ কৰে ।
লগতে পঢ়ক : ৰাজ্যসভাৰ ভোট: নিশা এপৰলৈকে স্থগিত ভোটগননা
