গুৱাহাটী, ৩০ মাৰ্চ : অসম-মেঘালয়ৰ ৬ টা বিবাদমান এলেকাক বিবাদমুক্ত কৰি মঙলবাৰে চুক্তিত স্বাক্ষৰ কৰিলে দুয়োখন ৰাজ্যৰ মুখ্যমন্ত্ৰীয়ে(Assam Meghalaya sign agreement to resolve border dispute) । নতুন দিল্লীত কেন্দ্ৰীয় গৃহমন্ত্ৰী অমিত শ্বাহৰ উপস্থিতিত অসমৰ মুখ্যমন্ত্ৰী হিমন্ত বিশ্ব শৰ্মা আৰু মেঘালয়ৰ মুখ্যমন্ত্ৰী কনৰাড চাংমাই এই চুক্তিত স্বাক্ষৰ কৰে(MoU signed between Assam Meghalaya CM) । এই ঐতিহাসিক চুক্তি সন্দৰ্ভত বুধবাৰে মুখ্যমন্ত্ৰী হিমন্ত বিশ্ব শৰ্মাই অসম বিধানসভাত এক বিবৃতি দাঙি ধৰে ।
মুখ্যমন্ত্ৰীয়ে অসম বিধানসভাৰ মজিয়াত এই চুক্তিৰ সন্দৰ্ভত কয় যে, বিবাদমান এলেকাসমূহ পৰিদৰ্শন কৰি পৰিস্থিতিৰ বুজ লৈ প্ৰতিবেদন দিয়াৰ বাবে মন্ত্ৰী পৰ্যায়ত তিনিখন কমিটি কৰা হৈছিল । এই কমিটিকেইখনে এলেকাসমূহ পৰিদৰ্শন কৰি ৰাইজৰ লগত মত-বিনিময় কৰিছিল । অনুৰূপধৰণে মেঘালয়ৰ কমিটিকেইখনেও মত-বিনিময় কৰিছিল । ইয়াৰ পাছত কমিটিকেইখনৰ কেইবাখনো বৈঠক অনুষ্ঠিত হৈছিল ।
এই প্ৰক্ৰিয়াৰ দ্বাৰা অসম-মেঘালয় সীমা বিবাদৰ ১২ টা এলেকাৰ ভিতৰত ৬ টাৰ মীমাংসা কৰা হয় । এইক্ষেত্ৰত দুয়োখন ৰাজ্যৰ মাজত বিবাদমান এলেকাৰ ভূমিৰ পৰিমাণ হৈছে ৩৬.৭৯ বৰ্গ কিলোমিটাৰ । ইয়াৰ ভিতৰত ১৮.৩৩ বৰ্গ কিলোমিটাৰ মেঘালয়ৰ লগত থাকি যায় আৰু ১৮.৪৬ বৰ্গ কিলোমিটাৰ অসমৰ লগত থাকে । মুখ্যমন্ত্ৰী লগতে কয় যে, তদুপৰি ইয়াৰ কিছুমান অঞ্চল মেঘালয়ৰ লগত বহু আগৰে পৰা আছে । নতুনকৈ হঠাতে দি দিয়া হোৱা নাই ।
প্ৰসংগক্ৰমে তেওঁ বৰাকৰ ৰাতাছেৰাৰ কথা উল্লেখ কৰি কয় যে, ইয়াৰ লোকসকল মেঘালয়ৰ লগত আছে আৰু মেঘালয়তে ভোট দিয়ে । বিবাদমান এলেকাৰ বিবাদ মীমাংসা কৰাৰ ক্ষেত্ৰত গ্ৰহণ কৰা পদক্ষেপৰ বিষয়ে উল্লেখ কৰি তেওঁ কয় যে তাৰাবাৰী এলেকাৰ ৪.৬৯ বৰ্গ কিলোমিটাৰ অঞ্চল মেঘালয়ক দিয়া হৈছে । দিজাং এলেকাৰ ২.৯ বৰ্গ কিলোমিটাৰ অঞ্চল মেঘালয়ক দিয়া হয় । সেইদৰে হাহিমত ৩.২১ বৰ্গ কিলোমিটাৰ এলেকা মেঘালয়ৰ সৈতে চামিল হৈছে ।
একেদৰে, বকলাপাৰাৰ ১.৫৭ বৰ্গ কিলোমিটাৰ বিবাদমান এলেকাৰ .৫৬ বৰ্গ কিলোমিটাৰ মেঘালয়ে লাভ কৰে । খানাপাৰা পিলিংকাটাৰ ২.২৯ বৰ্গ কিলোমিটাৰ বিবাদমান এলেকাৰ .৫ বৰ্গ কিলোমিটাৰ মেঘালয়ত চামিল হয় । বাকী সকলোখিনি অসমৰ লগত থাকিব । ৰাতাছেৰাৰ ১১.২ বৰ্গ কিলোমিটাৰ বিবাদমান এলেকাৰ ৬.৪২ বৰ্গ কিলোমিটাৰ মেঘালয়ে লাভ কৰিছে । তেওঁ কয় যে পূৰ্বতে ৰাতাছেৰাৰ গোটেইখিনি মেঘালয়ৰ লগত আছিল যদিও ৬.৪২ বৰ্গ কিলোমিটাৰক বাদ দি বাকীখিনি অসমৰ লগত থাকিব ।
মুখ্যমন্ত্ৰী শৰ্মাই আৰু কয় যে, এইখিনিৰ ওপৰত সিদ্ধান্ত লৈ প্ৰথমে বুজাবুজিৰ এখন খচৰা প্ৰস্তুত কৰা হয় । ইয়াৰ পাছত সৰ্বদলীয় বৈঠক অনুষ্ঠিত কৰা হয় আৰু বৈঠকত কংগ্ৰেছ আৰু অখিল গগৈক বাদ দি সকলো দলে ইয়াক আদৰণি জনায় । পৰবৰ্তী পৰ্যায়ত ছাত্ৰ সংগঠন লগত আলোচনা কৰা হৈছিল আৰু আছুৱে ঐক্যৱদ্ধ উত্তৰ-পূবৰ কথা কৈছিল । ইয়াৰ পাছত বুজাবুজিৰ চুক্তিৰ খচৰাখন কেন্দ্ৰীয় চৰকাৰলৈ প্ৰেৰণ কৰা হয় । ভাৰত চৰকাৰে চাৰ্ভে অৱ ইণ্ডিয়াক প্ৰাৰম্ভিক চাৰ্ভে কৰিব দিয়ে ।
চাৰ্ভে হোৱাৰ পাছত কেন্দ্ৰীয় চৰকাৰে দুয়োখন ৰাজ্যৰ মুখ্যমন্ত্ৰীক আমন্ত্ৰণ জনায় । সেইমৰ্মে মঙলবাৰে বুজাবুজিৰ চুক্তিখনত স্বাক্ষৰ কৰা হয় বুলি তেওঁ কয় । ইয়াৰ পাছৰ পৰ্যায়ত এই বিষয়টো সংসদলৈ যাব আৰু সংসদে বিধানসভাৰ মতামত বিচাৰিব পাৰে । সংসদত অনুমোদিত হ'লে এই চুক্তিয়ে পূৰ্ণতা লাভ কৰিব । সংসদে অনুমোদন জনালেহে চুক্তিখন চূড়ান্ত হ'ব বুলি তেওঁ কয় । এই চুক্তিখন হোৱাৰ পাছত সমগ্ৰ দেশতে চৰ্চা হৈছে ।
অসম-মেঘালয়ৰ এই নিদৰ্শন কৰ্ণাটক আৰু মহাৰাষ্ট্ৰৰ ক্ষেত্ৰত প্ৰযোজ্য কৰাৰ কথাও চৰ্চালৈ আহিছে বুলি মুখ্যমন্ত্ৰী শৰ্মাই সদনত সদৰি কৰে । সীমা বিবাদ নিষ্পত্তিৰ প্ৰসংগত তেওঁ কয় যে, এই সমগ্ৰ প্ৰক্ৰিয়াটোক সকলোৱে আদৰণি জনাইছে আৰু শান্তিপূৰ্ণভাৱে হৈছে । মানুহক বিশ্বাসকলৈ এই কাম কৰা হৈছে । স্থানীয় বিধায়কসকলেও সহযোগিতা কৰিছে ।
আনহাতে সীমা সমস্যাকলৈ চুবুৰীয়া ৰাজ্যসমূহৰ লগত জৰ্জৰিত হৈ থকাৰ ফলত উত্তৰ পূবৰ সম্পদ-সম্ভাৱনীয়তাৰ ওপৰত পৰা প্ৰভাৱ সম্পৰ্কে উল্লেখ কৰি তেওঁ কয় যে, অসম-মেঘালয়ৰ ৬ টা বিবাদিত এলেকাৰ সমাধানে ঐক্যবদ্ধ উত্তৰ পূবৰ এটা নতুন বীজ অংকুৰিত কৰিছে । সীমা সমস্যাৰ ক্ষেত্ৰত বাস্তৱৰ সন্মুখীন হ'ব লাগিব বুলি উল্লেখ কৰি তেওঁ কয় যে অসম-মেঘালয়ৰ বিবাদমান এলেকা ১২ টাৰ আৰু কোনো কাৰণতে বৃদ্ধি নহয় । ৬ টাৰ মীমাংসা হৈছে আৰু ৬ টাৰ হ'ব । ইয়াত আৰু ১৩ নম্বৰ নহয় বুলি ইতিমধ্যে মেঘালয় চৰকাৰে স্পষ্ট ৰূপত জনাই দিছে ।
অৰ্থাৎ আৰু নতুনকৈ বিবাদমান এলেকা হ'ব নোৱাৰে বুলি তেওঁ কয় । তেওঁ লগতে কয় যে, এই একেটা মডেল লৈ সীমা বিবাদৰ ক্ষেত্ৰত অৰুণাচল প্ৰদেশৰ লগতো আলোচনা আগুৱাই নিয়া হ'ব । অৰুণাচলৰ লগত ১২২ খন গাঁৱৰ সৈতে ১,১১৯ বৰ্গ কিলোমিটাৰ ভূমিক লৈ বিবাদ আছিল । আলোচনাৰ পাছত অৰুণাচল চৰকাৰে ৮৫০ বৰ্গ কিলোমিটাৰ ভূমিকলৈ বিবাদ থকা বুলি কৈছে । তেওঁ কয় যে, বিবাদমান এলেকাৰ সংশ্লিষ্ট বিধায়ক আৰু স্থানীয় ৰাইজে মিলি যদি বিষয়টো মীমাংসা কৰিব পাৰে তেন্তে তাত আমাৰ কৰিবলগীয়া একো নাই ।
স্থানীয় ৰাইজ মান্তি নোহোৱা পৰ্যন্ত চৰকাৰে একো কৰিব নোৱাৰে । অসম-অৰুণাচলৰ ক্ষেত্ৰত স্থানীয় কমিটি হ'ব আৰু স্থানীয় বিধায়ক থাকিব । দুয়োখন ৰাজ্যৰে বিধায়ক থাকিব আৰু স্থানীয় ৰাইজৰে মিলি কৰিব পৰা বিবাদখিনি মীমাংসা কৰিব । বাকীখিনি পৰ্যায়ক্ৰমে কৰা হ'ব । অসমে সাতভনীৰ জ্যেষ্ঠ হিচাপে নিজৰ দায়িত্ব-কৰ্তব্য পালন কৰিব লাগিব বুলি মুখ্যমন্ত্ৰীয়ে কয় ।
লগতে পঢ়ক : বিবাদমুক্ত উত্তৰ-পূৰ্বাঞ্চলৰ বাবে আজিৰ দিনটো ঐতিহাসিক দিন : অমিত শ্বাহ
