গুৱাহাটী, ২৮ জুলাই : মুখ্যমন্ত্ৰী হিমন্ত বিশ্ব শৰ্মাৰ সভাপতিত্বত আজি জনতা ভৱনত অনুষ্ঠিত ৰাজ্য চৰকাৰৰ সাপ্তাহিক কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় (Assam govt new cabinet decisions) । বৈঠকৰ অন্তত সংবাদমেল যোগে কেবিনেটৰ সিদ্ধান্তসমূহ অৱগত কৰে মন্ত্ৰী কেশৱ মহন্ত, ডাঃ ৰণোজ পেগু আৰু জয়ন্ত মল্ল বৰুৱাই (Assam cabinet decisions) ।
কেবিনেটৰ সিদ্ধান্ত অনুসৰি তৃতীয় শ্ৰেণীৰ পৰা দ্বাদশ শ্ৰেণীলৈ বিজ্ঞান আৰু গণিতৰ পাঠ্যক্ৰম ইংৰাজী মাধ্যমৰ হ'ব (Assam cabinet decisions for education sector)। কেবিনেটত শিক্ষা বিভাগৰ আন কেইবাটাও গুৰুত্বপূৰ্ণ সিদ্ধান্ত লোৱা হয় । মাতৃভাষাতে বিদ্যালয় থাকিব যদিও গণিত আৰু বিজ্ঞান বিষয় দুটা ইংৰাজীত পঢ়োৱা হ'ব । নিৰ্বাচিত কিছু বিদ্যালয়ত মাতৃভাষাৰ সমান্তৰালকৈ ষষ্ঠ ক্লাছলৈ ইংৰাজী ভাষাত অধ্যয়নৰ ব্যৱস্থা থাকিব (English medium for government schools in Assam)।
আনহাতে সমাজ অধ্যয়ন বিষয়টো মাধ্যমিক পৰ্যায়ত নাথাকিব । তাৰ ঠাইত দুটা নতুন বিষয় ভূগোল আৰু বুৰঞ্জী পঢ়োৱা হ'ব । অংগনবাড়ীৰ দুটা শ্ৰেণী আৰু প্ৰাথমিকৰ তিনিটা শ্ৰেণীৰ পাঠদান কৰা হ'ব মাতৃভাষাত । ঐতিহ্যমণ্ডিত ছোৱালী বিদ্যালয়ৰ বাহিৰে ৰাজ্যত নাথাকিব কোনো ছোৱালী বিদ্যালয় ।
আনহাতে ব্যক্তিগত খণ্ডৰ বিদ্যালয়ে ফী-ৰেগুলেটৰি অথৰিটিত পঞ্জীয়ন নকৰিলে দহ হাজাৰ টকাৰ জৰিমনা ভৰিব লাগিব । প্ৰাইভেট বিদ্যালয়ৰ ক্ষেত্ৰত থকা ৰেগুলেটৰি আইনৰ সংশোধন কৰা হৈছে । বৰ্তমানলৈ ৬০০০ ব্যক্তিগত বিদ্যালয়ৰ ভিতৰত ১৮০০ বিদ্যালয়ে পঞ্জীয়ন কৰিছে । বাকী সকলক ৰেজিষ্টাৰ কৰিবলৈ আহ্বান কেবিনেটৰ ।
আজিৰ কেবিনেটত অসমৰ নতুন পর্যটন পলিছি গ্ৰহণ কৰা হৈছে (Assam cabinet decisions for tourism)। সেই অনুসৰি ৫০খন চাহ বাগানক পৰ্যটন ক্ষেত্ৰলৈ উন্নত কৰা হ'ব । ইয়াৰ বাবে প্ৰতিখন বাগানক ২ কোটি টকালৈ ৰাজসহায্য দিয়া হ'ব । কেবিনেটত মানাহত জিঞ্জাৰ ব্ৰেণ্ডৰ হোটেল খোলাৰ সিদ্ধান্ত লোৱা হয় ।
তাৰোপৰি কেবিনেটৰ সিদ্ধান্ত অনুসৰি এতিয়াৰে পৰা অ'বিচি প্ৰমাণ পত্ৰ অসম মৰাণ সভাই দিব পাৰিব । কেবিনেটত গ্ৰহণ কৰা সিদ্ধান্ত অনুসৰি জলাহ সম্প্ৰদায়ে অ'বিচি প্ৰমাণ পত্ৰ লাভ কৰিব । পূৰ্বৰ দৰে এম অ' বি চিৰ প্ৰমাণ পত্ৰ দিয়া নহয় ।
আনহাতে ৰাজ্যৰ মেডিকেল কলেজ সমূহৰ চৌপাশ সেউজীয়া কৰাৰ লক্ষ্যৰে প্ৰতিখন মেডিকেল কলেজলৈ অতিৰিক্ত ধন আৱন্টন দিয়াৰ ব্যৱস্থা কৰা হয় কেবিনেটত । সেইদৰে গুৱাহাটী বিল্ডিং কনষ্ট্ৰাকচন আইনখন অসম বিল্ডিং কনষ্ট্ৰাকচন আইন (Assam building construction act) হিচাপে নামাকৰণ কৰা হয় । ৫ আগষ্টৰ দিনটো লোক কল্যাণ দিৱস হিচাপে পালন কৰা হ'ব । লোকপ্ৰিয় গোপীনাথ বৰদলৈৰ স্মৃতিত এই দিৱস পালন কৰিব ৰাজ্য চৰকাৰে ।
লগতে পঢ়ক : New state coordinator of NRC : পাৰ্থ প্ৰতিম মজুমদাৰক এন আৰ চিৰ গুৰু দায়িত্ব
