মৰাণ, 1 আগষ্ট : শুকুৰবাৰে ঘোষণা কৰা হয় হাইস্কুল শিক্ষান্ত পৰীক্ষা (HSLC result)ৰ ফলাফল ৷ চৰাইদেউ জিলাৰ সাপেখাতী আৰক্ষী থানাৰ অন্তৰ্গত ৰহন উচ্চ মাধ্যমিক বিদ্যালয়ত সদ্য ঘোষিত হাইস্কুল শিক্ষান্ত পৰীক্ষাৰ ফলাফলক কেন্দ্ৰ কৰি সৃষ্টি হৈছে উতপ্ত পৰিস্থিতি । দেশত সৃষ্টি হোৱা মহামাৰী কৰ'ণা ভাইৰাছৰ বাবে শিক্ষা পৰিষদৰ বিশেষ নিয়মাৱলীৰ মাজেৰে ঘোষণা কৰা ২০২০-২০২১ বৰ্ষৰ হাইস্কুল শিক্ষান্ত পৰীক্ষাৰ ফলাফলক লৈ অসন্তুষ্টি প্ৰকাশ কৰিছে ছাত্ৰ-ছাত্ৰীৰ লগতে অভিভাৱক সকলে ।
উল্লেখযোগ্য যে, ৰহন উচ্চ মাধ্যমিক বিদ্যালয়ৰ পৰা অৱতীৰ্ণ হোৱা মুঠ ৫৫ গৰাকী পৰীক্ষাৰ্থীৰ ভিতৰত ১৮ গৰাকী ছাত্র-ছাত্ৰীহে উত্তীৰ্ণ হয় । তাৰে ৭ গৰাকী প্ৰথম বিভাগত ৮ গৰাকী দ্বিতীয় বিভাগত আৰু তিনি গৰাকী তৃতীয় বিভাগত উত্তীৰ্ণ হ'বলৈ সক্ষম হয় । কিন্তু পৰীক্ষাৰ ফলাফলত সন্তুষ্ট নহয় পৰীক্ষাত উত্তীৰ্ণ নোহোৱা একাংশ ছাত্ৰ-ছাত্ৰী সকলৰ লগতে অভিভাৱকসকলো ।
প্ৰায় 15 (পোন্ধৰ) গৰাকী ছাত্র-ছাত্ৰীৰ লগতে 20 (বিশ) গৰাকীৰো অধিক অভিভাৱকে শনিবাৰে ৰহন উচ্চ মাধ্যমিক বিদ্যালয়ত প্ৰৱেশ কৰে ৷ ছাত্ৰ-ছাত্ৰীসকল উত্তীৰ্ণ নোহোৱাৰ বাবে একমাত্ৰ দোষী বুলি অভিযোগ কৰে বিদ্যালয় শিক্ষক সকলক ৷
লগতে পঢ়ক - শিক্ষান্ত পৰীক্ষাৰ মৃল্যায়নক লৈ অসন্তুষ্ট ৰঙিয়াৰ একাংশ ছাত্ৰ-ছাত্ৰী
অভিভাৱক আৰু শিক্ষাৰ্থীসকলৰ অভিযোগ বিদ্যালয়ৰ পৰা নম্বৰ কম দিয়াৰ বাবেই তেওঁলোক উত্তীৰ্ণ নহ'ল ৷ অন্য বিদ্যালয়ৰ সকলো ছাত্ৰ ছাত্ৰীকে নম্বৰ দি উত্তীৰ্ণ কৰালে আমাক কিয় পাছ মাৰ্ক নিদিলে আদি বিভিন্ন প্ৰশ্নৰে প্ৰধান শিক্ষকজনক জবাৱদিহিল কৰে ৷ আনহাতে, পৰীক্ষাত অৱতীৰ্ণ নোহোৱাকৈ তেওঁলোকক উত্তীৰ্ণ কৰাই দিব লাগিব বুলিও দাবী কৰে একাংশ অভিভাৱকে ।
যি সকল ছাত্র-ছাত্ৰী উত্তীৰ্ণ নহ'ল, তেঁওলোকে পুনৰ পৰীক্ষাত অৱতীৰ্ণ হ'ব লাগিব বুলি মন্তব্য কৰাত অভিভাৱক সকলে সেই নিয়ম কোনোপধ্যেই মানিব বিচৰা নাই । দেশৰ ক'ৰণাৰ ভয়াৱহতাৰ প্ৰতি লক্ষ্যৰাখি চৰকাৰৰ লগতে শিক্ষা বিভাগে পৰীক্ষা সন্দৰ্ভত এখন উচ্চস্তৰীয় কমিটি গঠন কৰি দিয়ে ৷ উক্ত কমিটি খনৰ সিদ্ধান্তমৰ্মে পৰীক্ষা নপতাকৈয়ে ফলাফল ঘোষণা কৰে শিক্ষা বিভাগে ৷ শিক্ষাবিভাগৰ এনে নীতি নিৰ্দেশনাৰ বিৰুদ্ধে একাংশলোক সৰৱ হৈ পৰে ৷
এচামে পৰীক্ষাত অৱৰ্তীণ নোহোৱাকৈ পৰীক্ষাত উত্তীৰ্ণ হোৱাৰ বিপৰীতে পৰীক্ষাত উত্তীৰ্ণ নোহোৱা সকলে কিয় পৰীক্ষাত অৱতীৰ্ণ হ'ব বুলি প্ৰশ্ন উত্থাপন কৰে ৷ তেনে নিয়ম কোনো কাৰণতে গ্ৰহণযোগ্য নহয় বুলি অভিভাৱকসকলে মত প্ৰকাশ কৰিছে । লগতে যিসকল ছাত্ৰ-ছাত্ৰীৰ ফলাফল বেয়া তেওঁলোককো উত্তীৰ্ণ কৰি দিবলৈ আহ্বান জনাইছে শিক্ষা বিভাগক ।
পৰৱৰ্তী সময়ত সাপেখাতী আৰক্ষী উপস্থিত হৈ থানাৰ ভাৰপ্ৰাপ্ত আৰক্ষী বিষয়া সুৰজ দত্তই অভিভাৱক সকলৰ সৈতে মত বিনিময় কৰি সমগ্ৰ ঘটনা নিয়ন্ত্ৰণলৈ আনে ।
লগতে পঢ়ক - ৰাজ্যৰ ভিতৰতে তৃতীয় স্থানত উজ্জ্বলিল ডিব্ৰুগড়
