ডিব্ৰুগড়, ২৪ অক্টোবৰ : ডিব্ৰুগড়ত মালবাহী আৰু যাত্ৰীবাহী জাহাজৰ বাবে বন্দৰ নিৰ্মাণৰ সিদ্ধান্ত গ্ৰহণ কৰিছে চৰকাৰে ৷ কেন্দ্ৰীয় বন্দৰ, জাহাজ আৰু আয়ুস মন্ত্ৰণালয়ৰ মন্ত্ৰী সৰ্বানন্দ সোণোৱালে দেওবাৰে ডিব্ৰুগড়ত ঘোষণা কৰে এই কথা ৷ এই ঐতিহাসিক আৰু যুগান্তকাৰী সিদ্ধান্তৰ ঘোষণাৰে দেওবাৰে বগীবিলৰ সম্ভাৱনাময় নদী পৰ্যটনস্থলী পৰিদৰ্শন কৰে কেন্দ্ৰীয় মন্ত্ৰী সোণোৱালে ।
কেন্দ্ৰীয় মন্ত্ৰীগৰাকীয়ে ভাৰতীয় ৰেলৱেৰ উচ্চ পদস্থ বিষয়া, বন্দৰ জাহাজ আৰু আভ্যন্তৰীণ জলপথ পৰিবহনৰ বিষয়াক লগত লৈ বগীবিল দলঙৰ সমীপত গঢ় লৈ উঠা পৰ্যটনস্থলীত আলোচনাত মিলিত হয় । উল্লেখ্য যে, এসময়ত মোহনাঘাট নদী পথেৰে ব্ৰহ্মপুত্ৰই দি জাহাজেৰে বংগোপ সাগৰৰ হৈ বিশ্বৰ বিভিন্ন প্ৰান্তৰলৈ গৈছিল বিভিন্ন সা-সামগ্ৰী । সেই ঐতিহ্যৰ কথা উল্লেখ কেন্দ্ৰীয় মন্ত্ৰীগৰাকীয়ে পুনৰ এই ডিব্ৰুগড়ৰ পৰা জাহাজ চলাচলৰ ব্যৱস্থা গ্ৰহণ কৰিব বুলি দোহাৰি স্থানীয় উৎপাদিত সামগ্ৰী বিশ্বৰ বজাৰলৈ লৈ যাব বুলি আশা কৰে ।
সোণোৱালে উত্তৰ-পূৰ্বাঞ্চলৰ জলপথ ব্যৱস্থাক শক্তিশালী ৰূপত গঢ় দিয়াৰ কথা উল্লেখ কৰাৰ লগতে আমদানি-ৰপ্তানি ক্ষেত্ৰত জলপথ আটাইতকৈ কম খৰচী আৰু উত্তম যোগাযোগ ব্যৱস্থা বুলি উল্লেখ কৰে ৷ তেওঁ লগতে ভাৰত-বাংলাদেশৰ মাজত বুজাবুজি চুক্তিৰ জৰিয়তে এই অঞ্চলৰ উৎপাদিত সামগ্ৰীসমূহে বিশ্বৰ বজাৰ দখল কৰিব পাৰিব বুলি আশা কৰে ।
তেওঁ লগতে ব্ৰহ্মপুত্ৰৰ কাষত বিভিন্ন স্থানত আটক ধুনীয়াকৈ "মাল্টিমৰ্ডেল লৰ্জেষ্টিক পাৰ্ক" নিৰ্মাণ কৰাৰ সিদ্ধান্ত অনুসৰি ইতিমধ্যে যোগীঘোপা, গুৱাহাটীৰ পাণ্ডু আৰু ধুবুৰীত তেনে ব্যৱস্থা কৰা বুলি জানিবলৈ দিয়ে । কেন্দ্ৰীয় মন্ত্ৰীগৰাকীয়ে ডিব্ৰুগড়ত বন্দৰ নিৰ্মাণৰ জৰিয়তে ব্ৰহ্মপুত্ৰ নদীৰ পৰ্যটনৰ সম্ভাৱনা যথেষ্ট উন্নয়ন হ’ব বুলি আশা কৰে । পৰ্যটকে ব্ৰহ্মপুত্ৰৰ সৌন্দৰ্য উপভোগ আৰু স্থানীয় নিবনুৱাসকলে অৰ্থনৈতিক উন্নয়নৰ ক্ষেত্ৰত ভূমিকা গ্ৰহণ কৰিব বুলি তেওঁ আশা ব্যক্ত কৰে ।
লগতে পঢ়ক : উপ নিৰ্বাচন : ৫ প্ৰাৰ্থীৰ বিৰুদ্ধে আছে অপৰাধৰ গোচৰ
