ডিব্ৰুগড়, 11 মে': ডিব্ৰুগড়ত আৰক্ষীৰ জালত বৃহৎ ভূমি জালিয়াতিৰ চক্ৰ । ডিব্ৰুগড়ৰ উপ পঞ্জীয়কৰ এজাহাৰৰ ভিত্তিত আৰক্ষীয়ে জালান ইণ্ডাষ্ট্ৰিজৰ মালিকৰ পুত্ৰ মৃগেন জালান(৬১),অধিবক্তা স্বাগতা কুণ্ডু, নেম চন্দ্ৰ কেজৰিৱাল(৭৭), সাৰদা দেৱী কেজৰিৱাল(৭০), অনিল কেজৰিৱালক(৪২)গ্ৰেপ্তাৰ কৰে । এম এচ নাছিং দাস সুৰজমল প্ৰ'প্ৰাইটৰ প্ৰাইভেট লিমিটেডৰ মালিক মৃগেন জালানে No1909 আৰু 1462 29/06/2017 নম্বৰৰ দলিল যোগে জিলা উপায়ুক্তৰ কাৰ্যালয়ৰ ভুৱা অনুমতি পত্ৰ দাখিল কৰি প্ৰায় দুবিঘা মাটি নেম চন্দ্ৰ কেজৰিৱাল, সাৰদা দেৱী কেজৰিৱাল আৰু অনিল কেজৰিৱালক বিক্ৰী কৰিছিল ।
ভুৱা অনুমতি পত্ৰৰে পঞ্জীয়ন তথা নথি পত্ৰ প্ৰস্তুত কৰিছিল ডিব্ৰুগড়ৰ অধিবক্তা ৰাজু কেজৰিৱাল আৰু স্বাগতা কুণ্ডুয়ে । কিন্তু অডিটৰ সময়ত পোহৰলৈ আহে সমগ্ৰ জালিয়াতিৰ তথ্য । District level committee Dibrugarh ৰ দ্বাৰা অনুমোদিত মূল্যতকৈ কম তথা ঠগ প্ৰৱঞ্চনাৰ দ্বাৰা উপায়ুক্তৰ কাৰ্যালয়ৰ ছীল আৰু উপায়ুক্তৰ চহীও জাল কৰি মাটি বিক্ৰী কৰিছিল অভিযুক্তই । জালিয়াতিৰ তথ্য পোহৰলৈ অহাত যোৱা 10 মে'ত ডিব্ৰুগড়ৰ উপ পঞ্জীয়ক ভূপেন পাটোৱাৰীয়ে ডিব্ৰুগড় সদৰ থানাত এজাহাৰ দাখিল কৰাৰ পাচতে আৰক্ষীয়ে তদন্ত কৰি অধিবক্তা সহ পাঁচ জনক গ্ৰেপ্তাৰ কৰিবলৈ সক্ষম হয় । আৰক্ষীয়ে ভাৰতীয় দণ্ডবিধিৰ U/S120B/465/467/471/472/34 IPCধাৰাৰ অধীনত 763/19 নং গোচৰত পাঁচ জনক গ্ৰেপ্তাৰ কৰে ।
