মৰাণ, 10 আগষ্ট : সমগ্ৰ দেশৰ লগতে ৰাজ্যতো ক’ৰণা মহামাৰীয়ে এক বিভিষীকাময় পৰিস্থিতিৰ সৃষ্টি কৰিছিল ৷ সম্প্ৰতি এই মহামাৰী ক’ৰণাৰ প্ৰকোপ কিছু পৰিমাণে কমি আহিছে যদিও ইয়াৰ আতংক কমা নাই ৷ ৰাজ্য চৰকাৰে শেহতীয়াকৈ ক’ভিড পৰিস্থিতিৰ প্ৰতি লক্ষ্যৰাখি ক’ভিড-19ৰ নীতি নিৰ্দেশনা জাৰি কৰি আহিছে সময়ে সময়ে ৷
এতিয়া কিছু পৰিমাণে ক’ভিডৰ নীতি নিৰ্দেশনা শিথিল কৰিছে ৰাজ্য চৰকাৰে ৷ অৱশ্যে যি কেইখন জিলাত ক’ভিড সংক্ৰমণ কমা সেই কেইখন জিলাত এতিয়াও ক’ভিডৰ নীতি নিৰ্দেশনা কঠোৰভাৱে বাহাল আছে ৷ সেই অনুসৰিয়ে চৰাইদেউ জিলাৰ জিলা দণ্ডাধীশে " দ্য আসাম ক'ভিড -১৯ ৰেগুলেচনছ, ২০২০" ৰ ৩৪ নং ধাৰাৰ লগতে ভাৰতীয় ফৌজদাৰী কাৰ্যবিধি আইনৰ ১৪৪ ধাৰাৰ অধীনত এক নিৰ্দেশ প্ৰদান কৰিছে ৷
এই নিৰ্দেশৰ জৰিয়তে সমগ্ৰ চৰাইদেউ জিলাখনতে প্ৰযোজ্য হোৱাকৈ ৰাজহুৱা স্থান, কৰ্মক্ষেত্ৰ, কাৰ্যালয়ত মাস্ক পৰিধান কৰাটো বাধ্যতামূলক কৰিছে ৷ লগতে ৰাজহুৱা স্থানত ৫ জন বা ততোধিক লোক গোট খোৱা আৰু ৰাজহুৱা স্থানত থু-পেলোৱাটো সৰ্ম্পূণ ৰূপে নিষিদ্ধ কৰিছে ।
আনহাতে, যি সকলে এই নিৰ্দেশ ভংগ কৰে তেওঁলোক বিৰুদ্ধে Disaster Management Act-২০০৫ ৰ অধীনৰ ধাৰা ৫১ ৰ পৰা ৬০ লৈকে আৰু আইপিচিৰ ১৮৮ ধাৰা অনুসৰি আইনমতে বিহিত ব্যৱস্থা গ্ৰহণ কৰা হ’ব বুলি নিৰ্দেশটোৰ জৰিয়তে সকিয়াই দিয়ে চৰাইদেউ জিলাৰ জিলা দণ্ডাধীশে । উল্লেখযোগ্য যে, শেহতীয়াকৈ সোমবাৰে প্ৰকাশ কৰা ক’ভিড নতুন নীতি নিৰ্দেশনা অনুসৰি সন্ধ্যা 5 বজালৈকে সকলো দোকান-পোহাৰ খোলাৰ অনুমতি প্ৰদান কৰা হৈছে ক’ভিড সংক্ৰমণ হ্ৰাস পোৱা জিলাকেইখনত ৷
মনকৰিবলগীয়া যে, অহা 16 আগষ্টৰ পৰা আন্তঃজিলা যাতায়ত ব্যৱস্থা পুনৰ আৰম্ভ হোৱাৰ সম্ভাৱনা আছে ৷
লগতে পঢ়কঃ দাবী কৰা ধন নিবলৈ আহি আৰক্ষীৰ জালত পৰিল ভুৱা উগ্ৰপন্থী
