গোলাঘাট, 25 এপ্ৰিলঃ সঘনাই বিভিন্ন ধৰণৰ অভিযোগ উত্থাপন হৈ থকা অসমৰ এটা অন্যতম কার্যালয় হৈছে বিদ্যুৎ বিভাগৰ কার্যালয় ৷ এইবাৰ গোলাঘাটত এখন বিদ্যুতৰ বিলে অভিলেখ ৰচিলে অসম শক্তি বিতৰণ কোম্পানী লিমিটেডে ৷ গোলাঘাট নগৰৰ মাজমজিয়াত অৱস্থিত এখন ব্যৱসায়িক প্ৰতিষ্ঠানৰ মাৰ্চ মাহৰ লাইটৰ বিল আহিল ৮২ লাখ ৫৮ হাজাৰ তিনিশ ৩৬ টকা ৷ ইয়াকে লৈ শংকিত হৈ পৰা ব্যৱসায়িক প্ৰতিষ্ঠানটোৰ গৰাকী কাষ চাপিল শক্তি বিভাগৰ ৷ বিলৰ পৰিমাণ চাই শক্তি বিভাগৰ কর্মচাৰীৰ ভুলৰ বাবেই এনে হোৱা বুলি জনায় সংমণ্ডল বিষয়াই ৷
উল্লেখ্য যে,কার্যালয়টোত এইটোৱেই প্ৰথম অভিযোগ নহয়, সাংবাদিকক দেখি শক্তি বিভাগৰ বিভিন্ন অভিযোগ উত্থাপন কৰিলে গ্ৰাহকসকলে ৷ দৰিদ্ৰ পৰিয়ালক চৰকাৰীভাৱে প্ৰদান কৰা বিদ্যুতৰ বিলৰ ক্ষেত্ৰটো দেখুৱালে বহু সমস্যা ৷ যিমান পৰিমাণৰ বিল হ'ব লাগে তাতকৈ অধিক বিল প্ৰদান কৰাৰো অভিযোগ উঠিছে শক্তি বিভাগৰ বিৰুদ্ধে ৷
